Bawngkawn kawng chhe kumtin lai siamthat tum

Bawngkawn kawng chhe kumtin lai siamthat tum
Bawngkawn huamchhung, Durtlang peng Traffic Point leh Sairang peng Traffic Point inkar kawng, levelling dik lo avanga ruahtui/ tuihawk inpaih chak tawk loin kumtina kawngpui tichhia a; mipui tana harsatna nasa tak a thlen fo thin chu road engineering tha zawk nen PWD chuan siamthat a tum a. Siam a nih chhung hian lirthei a tlan theih dawn loh.
PWD National Highway Division-I chuan helai kawngpui hi ‘peg’ khenga uluk taka thuah hnih (two layer) a resurfacing hna thawh a tum a. Road levelling uluk leh fimkhur taka tih a ngaih avangin November 17 (Pathianni) zing dar 7.00 atanga tlai dar 5.00 thleng kawng siam hna hi thawh tur a ni.
Hna thawh a nih chhung hian lirthei engmah (emergency/ ambulance damlo phur leh rikrum thila veivakte tiam loin) kaltlang theih loha khar a ni dawn tih senior SP Traffic chuan mipui a hriattir a. Hei hian lirthei leh mipui veivak tan rokhawlhna a thlen theih dawn avangin helai kawngpui hmangtute a theih anga lo inhmakhua tura hriattir an nih bakah hnathawhna huamchhungah bungrua /lirthei engmah dah phal a ni lo tih a sawi.
Sairang road atanga Ramhlun/ Chaltlang lam kal tur leh Thuampui atanga Durtlang lama kal turte tan traffic point hel loin tlan theih a ni anga; Durtlang, Thuampui leh Zemabawk lama kal turte tan Ramthar Veng, Chite Veng, Bethlehem Veng leh ITI Veng leh Salem Veng lam atangin kal theih a ni.