Bawrhsap leh CYLA hruaitu tharte inkawm
Nimin khan Lawngtlai Bawrhsap Pu Donny Lalruatsanga chuan a Office Chamber-ah CYLA hruaitu tharte kawmna a nei a. Pu David Lalrinawma, Addl. DC chuan a tawiawm a ni.
Pu Donny Lalruatsanga chuan CYLA hruaitu tharte lawmpuina leh duhsakna a hlan hmasa a. NGO lian ber leh pawimawh ber an nihna angin, Lawngtlai mipuite tan theihtawp chhuah zel turin a fuih a. Sawrkarin a kalpui mek Ruihhlo do (Operation Jericho ) leh kawng dangah thahnemngai taka thawhpui turin a sawm a. Sawrkar Department – ten hmalakna tha tak an neihna turah CYLA chu a daitheutu pawimawh tak an ni tiin, ram leh hnam tana thawhpuiah a sawm a. Ruihhlo do kawngah CYLA hnuaia Drug Reduction Squad (DRS) te chak zawka hmalak zel tura a beisei thu a tarlang a ni.
Bawrhsap chuan Foreigners- chungchangah hmalakna tur tam tak a awm a, sumdawnna kawngah SOP felfai tak siam a tul hle tih tarlangin, hemi kawngah hian inkaihhruaina khauh taka kalpui a nih tur thu sawiin, CYLA te thawhpuiah a sawm a. Pu Donny Lalruatsanga chuan CYLA- te chu Lawngtlai District – tana kut leh ke ber an nihna angin, Lawngtlai District- hmasawnna tura theihtawp chhuaha thawhpui zel turin a sawm a ni.
Pu F. Lalrothanga, President, CYLA chuan Bawrhsap- in Lawngtlai District hmasawnna tura thahnem ngai taka hma a la thin chu fakawm a tih thu a sawi a. Bawrhsap chak tak hmalakna chu CYLA chuan a thlawp tlat tih tarlangin, Lawngtlai district hmasawnna turah CYLA an tlanchhe ngai dawn lo tih sawiin, tha taka sawrkar an thlawp tur thu a tarlang a. Hruaitu thlan thar chauh nimahse chak taka hmalak a nih thu sawiin, Central Executive Commitee (CEC) – thutkhawm hunah hmalakna tur hrang hrangte siamfel a nih tur thu a sawi a ni.
Pu JH. Lalrindika, General Secretary chuan Bawrhsap hova thutkhawm neih a ni chu lawmawm a tih thu sawiin, Sawrkar leh CYLA – inkarah thawhhona tha a awm zel a beisei tih a tarlang a. Lawngtlai District hmasawnna turah CYLA – ten theihtawp an chhuah tur thu sawiin, Sawrkar Commitee – peng hrang hrangah NGO telna awmah CYLA – te tel zel a tul hle a ti a. Lawngtlai District hmasawnna turah CYLA – ten theihtawp an chhuah zel tur thu a sawi bawk.
Thutkhawmah hian Central Young Lai Association (CYLA) Office Bearers (2026-2028) te an tel kim tha hle a, Pu Donny Lalruatsanga chuan lawmthu sawina neiin hun a khar.
Bawrhsap leh CYLA hruaitu tharte inkawm
