Bundesliga season kal laia tlawm an pumpelh reng hnuah defending champion Bayern Munich chuan Inrinni khan ngam loh val an tawng ve ta nge nge a, mualneitu Eintracht Frankfurt chuan 5-1 tehrengin an sawp!
Frankfurt an sut hma thleng khan Bavarians hian tun season-a league game an khelh tawh vawi 12-ah goal kua chiah la chhuahin, Eintracht lakah erawh an tlarhnung a pawp nasa hle a, an striker goal thun thei Harry Kane pawhin goal a sualchhuak zo lo a, mikhual team goal neihchhun hi chawlhlawk dawna Joshua Kimmich thun niin, he mi hma hian Omar Marmoush, Eric Ebimbe leh Hugo Larsson-te goal khat diat diat thawhkhawm hmangin mualneitu team hian sithum faiin hma an hruai hman.
Kimmich-a goal luh hnuah Eintracht lam hian goal hnih dangin mikhual team hi an thungrul ve leh a, Deutsche Bank Park-a goal lut hnuhnung pahnih hi Ebimbe leh Ansgar Knauff-te tihluh a ni ve thung.
Table-a pahnihna luahtu Bayern hian point thumin hmahruaitu Bayern Leverkusen an pha lo a, nizan result tarlan hman lohah Leverkusen hian mualneitu zawk leh league-a pathumna ni mek VfB Stuttgart an hneh chuan game khata khel tam chungin Munich team laka an chungnun zawkna hi point rukin a san belh leh ang.
Eintracht Frankfurt khelmualah khan England captain Harry Kane chuan minute 90 a khel tluan a, season kal laia Bundesliga game tum 13 khel zo vek chunga goal a khung zawh loh vawithchiah niin, league match vawi 13 a khelh tawh atanga goal 18 khawl tling tawh Englishman hian league season kal laia a club thar tlawm tur a chhan zo ta bik lo.
Bayern manager Thomas Tuchel chuan a naute’n khelh dan tura a ruahman ang tihpuitlin an nei lo tih sawi chungin, “Karliamtaa kan inkhelh loh hnuin vawiin hian kan naute’n an thapui an chhuah hlei thei tlat lo a, mimal tihsual a tam lutuk deuh bawk,” a ti.
Frankfurt kha an league game khelh hnu-hnung vawithuma tlawm fai vek an ni a, mahse, Bundesliga bika goal nga an thun hnuhnun ber tuma an lo sawp tawh bawk Bayern lakah kum 2019-a an chakna ngai bawk 5-1-in an chak nawn leh ta a ni!
Karliamta Nilaini khan Eintracht Frankfurt hi German Cup atangin third tier club Saar-brucken chuan an hnawt-chhuak a; he Saar-brucken team tho hi second round-a Bayern hnehtute kha an ni!
Bundesliga table-a pasarihna luahtu Frank-furt hian Ningani zanan Europa Conference League khel turin Aberdeen khelmual an lut zui leh ang.
Bayern Munich hi Champions League last 16 lut fel tawh niin, naktuk zan hian a group mtch hnuhnungber turah Manchester United an hmachhawn dawn a, he boruakah hian midfielder Thomas Muller chuan chiang taka an tlawm hnuah an mualphona chu an chhanlet ngei a ngaih thu a sawichhuak.
United tan last 16 lut tura chak ngei ngei a ngaih tawh bakah Copenhagen leh Galatasaray inhnehtawk an la mamawh tel cheu a, Old Trafford club dinhmun a khirh tawh.
Bayern chak loh vawi khatna
