Inrinni zanah 5-1 tehrenga mualneitu RB Leipzig sawp lehin Bundesliga table-ah Bayern Munich chu point 11 ngawtin an hnuai chiaha pahnihna luahtu Borussia Dortmund nen an inthlau ta.
Red Bull Arena inkhelah hian first half minute 20-na lekah table-a palina luah mektu mualneitu team tan Romulo Cruz chuan goal a khung a, hei bak hi chawlhlawk hmain goal dang a luhbelh lo.
Romulo goal hian Bayern a chhaih thinrim a ni ta lek a, second half chhungin mikhual team hian goal nga zetin an lama si khat lut an chhanglet!
Minute 88-a goal hnuhnungber khungtu substitute Michael Olise chuan assist lamah hat-trick siamin, France winger ball chhawp atang hian Harry Kane, Jonathan Tah leh Aleksandar Pavlovic-te’n goal an khung a; Bayern siphurh suttu kha Serge Gnabry a ni thung.
Manager Vincent Kompany chuan Crystal Palace winger hlui Olise kha bench lamah a dah phawt a, second half-a a luhtir hnuah game herdanglamtirtu langsar a ni.
Tun kha Bundesliga away game half time laia si khat faia hnufual zet chungin Bayern-in goal nga emaw a aia tama an si phurh an chhanlet vawi hnihna niin, a hmasa zawk chu kum 1976 daih tawha VfL Bochum khelmuala 6-5 hnehna an sualchhuah tum kha a ni.
Inrinni vek khan pahnihna luahtu Dortmund pawhin last minute-a chakna goal khungin St Pauli lakah 3-2 hnehna an chang a, Bavarians nena an inthlau zual zel tur an dang thei hram a ni.
Bayern hmahruaina a chhah tawlh tawlh
