Tun season inelna hrang hranga Bayern Munich tana goal 10 khung tling tawh Harry Kane chuan Inrinni zanah a kheimit a tina a, Bayer Leverkusen nena 1-1 draw bak an pelh zawh loh tuma a hliam avang hian minute 86-ah khelmual a chhuahsan.
Vincent Kompany chuan chuan England captain inhliam hi a serious loh a beisei thu sawi chungin Nilaini zan Champions League game-a Aston Villa an luhkhung hunah a fit hman a beisei thu a tarlang tel.
Belgian coach chuan, “Doctor chu ka ni hauh lo a, mahse, serious em em a nih ka ring lo. Endik a nih hma chuan thui tak sawi theih erawh a ni lo a, Nilaia inpeih hman turah ngai phawt ang,” a ti.
Bayern sporting director Max Eberl ve thung chuan, “Harry meuhin khelmual a chhuahsan chuan engemaw a awm tihna a ni a, hliam dinhmun chhe tak a nih loh beisei phawt ang,” a ti.
England interim boss Lee Carsley pawhin beiseinain hliam serious anih loh hram a lo beisei ve mek a, Nations League match-a Greece (10 October) leh Finland (13 October) an hmachhawn tur thlir chungin a captain lakah hian hliam serious a ngaihtuah duh bik lo ang!
Inrinni Bundesliga game-ah khan Bayer Leverkusen lamin Munich khuaah goal khung hmasa zawkin, minute 31-ah Granit Xhaka chhawpsak atangin Robert Andrich chuan mikhual hmahruaina goal a thun.
Minute riat a kal leh tihin Aleksandar Pavlovic chuan chuan Bayern siphurh a sut a; a hnuah Kane chuan Serge Gnabry cross ball vawrhchhuah atangin chance tha eltiang hmu bawk mah se goal ban a petper a, ball letleh atanga chance hmu lehin, hei pawh a hmangtangkai zo leh ta lo a, goal kham a tihper leh!
Alphonso Davies pawhin box tlanghriam lai atangin goal ban sirah a thawnchhuak a, Konrad Laimer pawhin a hun tha neih a bawhpelh ve bawk.
An kawtkaia an point khat thawhchhuah leh hmangin Kompany team Bayern hian Bundesliga table-ah hma an hruai chhunzawm zel a; league tir lam khelh ngaah vawili chak tawhin, point 13 an kawl mek a; Xabi Alonso team Leverkusen chuan point 10 hum chungin pathumna an luah.
Zirtawpni khan Borussia Dortmund chuan comeback pui tak nen VfL Bochum lakah 4-2 hnehna an chang ve bawk.
Bayern Munich chak zawh loh zana inhliam Kane
