Beckham chhungkaw buaina chung- changah Brooklyn a tawng chhuak
David Beckham leh Victoria Beckham te fa upa ber Brooklyn Beckham, kum 26, (a nupui neih hnuah a nupui hming tawm telin Brooklyn Peltz Beckham a inti ta) chuan an chhungkaw buaina chungchang sawi chhuakin, “Ka chhungte nena remthu sawi ka tum lo e,” a ti ta bur mai.
Brooklyn hian Instagram a chhungte nena inbiakremna lam hawi a tum loh thu hi post-in, a nupui Nicola Peltz Beckham-i’n a thunun niawma an puhna chu chhang letin, “Tuman min thunun lo, ka nuna a vawi khat nan keima tan ka thuin ka ding chhuak ve a ni,” a ti.
Brooklyn chuan an chhungkaw chungchangah a chhungte chuan press lam an thunun hneh hle thin ni a sawiin, chu chu a damchhunga a thil tawn thin a nih thu a sawi a, a nupui Nicola Peltz Beckham nena an inkarah hem thlak tumin an che thin nia puhin, “Kan inneih hma atangin hetiang hi an ti tawh a, a la tawp thei lo a nih hi,” a ti.
Brooklyn chuan, “Kan inkuhsuih hma zanah, ka chhungten Nicola chu ‘kan thisen’ leh ‘chhungkua’ a nih loh thu min hrilh a. Khata tang khan kei leh ka chhungkaw tan ka ding ve tan ta a ni, ka nu leh pa ten tawp chin nei lovin min bei zui a, mimal tak leh a langsar tak pawhin an che a, an duh danin chanchinbu lamah a chhuak thin,” a ti bawk.
Brooklyn chuan a nupui thlavang hauhin, “Theih tawp chhuaha inzawmna tha neih kan tum chung pawhin ka chhungten ka nupui hi zah lo takin an ti thin a,” a ti a, “Hlauhthawnna nasa tak neiin ka seilian a, tunah chuan ka nuna a vawi khat nan ka chhungte lak atangin ka inla hrang a, ka hlauhthawn thinna chu a kiang ta vek zawk. He nun thar ka thlan avanga lawm takin zing ka tho thin ta zawk a, chawlhna leh hahdamna ka chhar ta zawk a ni,” a ti.
Brooklyn chuan a nupui, Nicola, kum 31, nena chhungkaw nun hman zui an tum dan sawiin, “Ka nupui nen hian tuten emaw an thunun, nun lem kan duh lo. Zalenna, privacy leh hlimna kan tan leh kan chhungkaw la din zel tur tan kan duh ber a ni,” a ti bawk.
Brooklyn hi David leh Victoria te fa pali zinga upa ber niin, Romeo Beckham, kum 23, Cruz Beckham, kum 20 leh Harper Beckham, kum 14, te nen unau an ni.
Beckham chhungkaw buaina chung- changah Brooklyn a tawng chhuak
