Dollar maktaduai 200 chuang senga an siam, spy comedy, Matthew Vaughn channa ‘Argylle’ chuan tun weekend kalta khan North America-ah cinema hall ticket hralhna atangin dollar maktaduai 18 a la lut a, opening weekend a sum lakluhah beisei pha lo hle mah se box office-ah a No.1 tho e.
Film tlangzarh thar dang a awm mumal lo a, chu chu Argylle pawh hian a No.1 theih phah niin a lang. He film hian US pawnah, ram hrang hrang 78 atangin dollar maktaduai 17.3 a lalut thei bawk a, tihian opening weekend-a a lakluh zawng zawng chu dollar maktaduai 35.3 a ni.
He film hi Hollywood star lar rual channa a ni a, Matthew Vaughn bakah Bryce Dallas Howard, Henry Cavill, Sam Rockwell, Bryan Cranston, John Cena, Ariana DeBose, Dua Lipa, Catherine O’Hara, Sofia Boutella leh Samuel L. Jackson te pawh an inlan a, hetiang khawp star power nei chung hian beisei a pha lo hle a ni.
Tun weekend kaltaa film tlangzarh thar dang chu Kristian film series The Chosen: Season 4, Episode 1-3 a ni a, Episode 4-6 pawh tun thla chawhnu lamah cinema hall-ah an tichhuak leh ang. He film hi beisei aiin a che tha ve thung a, dollar maktaduai 6.1 lalutin box office No.2 a ni. He film hi Ningani zana tlangzarh a nih avangin weekend bakah ni khat a lo chhuak hman tawh a, chu nen chuan dollar maktaduai 7.5 a tlin ve nghal.
The Beekeeper pawhin a kar linaah dollar maktaduai 5.3 lalut lehin No.3 a la ni a, he film hian kar li chhungin US-ah dollar maktaduai 49.4 a lalut tling tawh a, US pawnah dollar maktaduai 73.1 lalut tawh bawkin, a vaiin dollar maktaduai 122.5 a tlin ve ta bawk.
Krismas vuakveta box office No.1, ‘Wonka’ pawhin dollar maktaduai 4.8 lalut lehin, No.4 a la ni a, he film hian US pawnah dollar maktaduai 270.6 lalut tawhin, a vaiin dollar maktaduai 571.7 a lalut tling ta.
Box office top 10:
1 Argylle $18,000,000
2 The Chosen: Season
4 Episodes 1-3 $6,035,823
3 The Beekeeper $5,286,616
4 Wonka $4,765,000
5 Migration $4,110,000
6 Mean Girls $4,000,000
7 Anyone But You $3,500,000
8 American Fiction $2,301,532
9 Poor Things $2,128,000
10 Aquaman and the Lost Kingdom $2,015,000
Beisei pha lo hle mah se Box Office-ah ‘Argylle’ a No.1
