Ningani zan khan World Cup khel tur ram thenkhatten inbuatsaihna neiin friendly match an khel a. World Cup 2026-ah champion tura rinkai France leh Spain ten beisei an phak lo. Ivory Coast lakah France an tlawm a. Spain leh Iraq an inhnehtawk ve bawk.
France an tlawm
World Cup 2018-ah champion a, 2022 a final lut leh bawk France hian Nates khawpuia Stade de la Beaujoire-ah Ivory Coast an mikhual. Player hrawl tak tak kawl khawmtu France hi an mualah chak ngei tura ngaih ni bawk mah se an player tha chhawr chungin tlawm zawkah an tang tlat thung a. An result hian football khawvel a barakhaih.
France hian an mualah hnehna chan ngei tumin tan an khawh a, bul pawh an tan chhe lo viau. Na takin an mikhualte an nawr a, goal pawh an thun teuh thei hle. Goal thun theihna hun tha nei bawk mah se uiawm tak takin an hlah fo. An hun tha neih hlah fo mah se Manchester City tana khel tha tak Rayan Cherki chuan chawlhlawk dawn hnaih minute 45-naah hmahruaina goal a thun ta nge nge a, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal hnih a luh belh. Second half tantir minute 53-naah Guela Doué chuan Ivory Coast tan goal thunin an si phurh a sut. Elephants si phurh sutna goal thuntu Guela Doué hi PSG leh France tana khel Desire Doue unaupa a ni a.
Goal khat ve ve an thun hnuin inkhel a hmuhnawm a, chak tumin tan an khawh zui nasa hle. Hun tawp dawn hnaih minute 84-naah Manchester United midfielder Amad chuan Ivory Coast tan hma an hruai letna goal a thun. Amad goal thun hmang hian team lian France chu an mualah ngei 2-1 in an hneh a, result tha tak an hlawhchhuak.
An player thate chhawr chunga an mualah an tlawm vangin France teram lakah rinhlelhna tam tak a awm a. World Cup 2026 ah palian tak ni chunga beisei an phak loh mai a hlauhawm hle. France boruak a hniam lai hian Ivory Coast erawh an phur phah viau thung a. World Cup-ah phur leh beiseina sang zawk nen an inlan zui ngei a rinawm.
Spain an chak zo lo
An mualah France an tlawm laiin World Cup 2026-ah champion tura rinkai ber Spain pawh an chak zo bik lova, Iraq nen 1-1 in an inhnehtawk.
Spain leh Iraq te hi Riazor, La Coruña-ah an inkhel a mualneitu Spain hian an player tha chhawr lovin an B team a ngaih an chhawr. An B team Iraq lakah bul an tan tha a, Ferran Torres chuan minute 16-na lekah hmahruaina goal a thun.
Mualneitu Spain lakah goal chhuah hma viau mah se Iraq in goal an thun zui ve thuai a, Merchas Doski chuan minute 27-naah goal thunin an si phurh a sut. Darkar chanve an khel tlin hmaa goal lut bak hi hun tawp thlengin goal dang a luh belh thei lovaa, rin loh takin Spain leh Iraq te chu 1-1 in an inhnehtawk.
World Cup 2010 champion leh European champion ni mek bawk Spain hi World Cup 2026-ah champion tura rinkai ber an ni mek. Player an nei tha rual a, football a thiamna ril nei ram an ni bawk nen an champion em lo a nih pawhin team hmuhnawm tak chu an ni ngei ang.
Mexico an chak chiang
Zirtawpni zing khan inelna thlengtu tur Mexico chuan Estadio Nemesio Díez Riega-ah Serbia an mikhual a, 5-1 ngawtin hnehna an chang.
Serbia hian mikhual an nihna hmunah bul an tan tha a, Petar Stanic chuan minute 19-na lekah hmahruaina goal a thun nghal. Hma takah goal thun bawk mah se mualneitu an chhaihkawlh a ni ta lek fang a. Goal nga ngawt an chhuah laiin goal an thu ve thei tawh lo.
Mexico tan hian Johan Vásquez chuan minute 34-naah goal thunin an siphurh a sut a. Minute 45+2-a Stefan Bukinac own-goal hmangin hma an hruai let. Chawlhlawk hnu lamah Raúl Jiménez, Adem Avdic leh Luis Chávez te goal thun hmangin hnehna an chang a. World Cup khel turin inbuatsaihna hun tha tak an hmang.
Beisei phak lo France leh Spain
