World Cup 2026 ah player nei tha rual bera ngaih leh tantu ngah tak Portugal khelh hun a thleng a, nghakhlel taka thlir Portugal leh DR Congo te inkhel chu beisei phak lovin a tawp a, 1-1 in an inhnehtawk ringawt. Group K a inkhel dangah Colombia in Uzbekistan an hneh a, group hmahruaitu an ni.
Bul tan tha Portugal
Team ngaihven hlawh Portugal in mi tam takin an hriat lar loh DR Congo lakah bul an tan tha hle. Star rual awm khawm ti hiala sawi theih Portugal hi an that zualna chu midfield-ah a ni a, rin lawk ang ngeiin EPL a player tha ber, season khat chhunga assist ngah ber record thar siam hialtu Bruno Fernandes hovin, Ligue 1 leh Champions League a PSG champion puitu Joa Neves leh Vitinha te an inkawp a, Real Madrid player thar Bernardo Silva a inlan bawk. An ni ho hian player ropui, footballer zinga goal thun hnem ber Cristiano Ronaldo an chawm a, ‘Goal eng zat tak thun ang maw?’ tih chu khawvel mipui zawhna a ni.
Beisei lawk ang ngeiin Portugal in bul an tan tha a, goal pawh an thun thuai. Mawi taka an khingpui tlar hnung an thiah hnuin Joa Neves chuan fuh takin a tauh goal a, minute 6-na lekah a tauh goal. Hma takah goal an thun vangin Portugal an phur a, inrintawkna sang zawk nen an inlan chhunzawm.
DR Congo hmel thar
Portugal laka rinkai zo lo DR Congo hi hma taka goal an chhuah vangin an dinhmun chhe viau mah se mak tak maiin hmel thar an lantir a, goal an chhuah hnuin a khel tha zawk hlauh thung. Fimkhur leh thiam taka an tlarhnung veng chung siin an khingpuite na takin an nawr let thin a, hlauhawm an siam ta zauh zauh. Inhel a rei a, DR Congo an hlauhawm tulh tulh laiin Protugal an hlauhawm lo tulh tulh thung. Phur leh taho taka inlan DR Congo hian chawlhlawk dawn hnaihah goal an thun ta nge nge a, minute Yoane Wissa tauh luh hmangin an si phurh an sut a, khawvel an barakhaih. Chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, goal thun tumin an innawr tawn nasa hle. Portugal in Bernardo Silva lachhuakin ball thiam leh che rang Francisco Conceicao an dah lut. Conceicao a luh hnuin an hlauhawm sawtnaa an hun tha neih an chhawr tangkai thei chuang lo. Hun tawp dawn hnaih lamah Rafael Leao leh Concalo Ramos te lut leh bawk mah se DR Congo tlarhnunga inremphui tak an thiat thei lova, goal an thun belh thei lo tluan. DR Congo lam pawhin hlauhawm takin nawr thin mah se goal an thun thei bik lova, inkhel hmuhnawm tak chu 1-1 in a tawp.
Portugal hian 75% zet ball an chang a, World Cup-ah ball an chan tam ber tum a ni. Ball chang tam viau mah se an khingpuite aiin shot on target an nei tlem zawk tlat thung. Portugal hian World Cup-a an match hmasa berah chak an harsat ve hrim hrim a, 2022 a an chak bak World Cup hnuhnung pangaa an match hmasa berah an chak zo lo vek.
Ronaldo harsatna
Player ropui Cristiano Ronaldo chuan DR Congo lakah beisei a phak lova, goal a thun lo. Ronaldo hian World Cup-ah a zawnin match nga chhung goal a thun lo zawn tawh a. Major tournament (World Cup & Euro) ah a zawnin khelh 10 chhung zet goal a thun tawh lo bawk. Footballer zinga goal thun hnem ber Ronaldo hian inelna lianah harsatna a tawk mek a. A harsatna tawh hi a vaikian thuai erawh a rinawm.
Beisei phak lo Portugal
