Bekang tha lo ei vangin mi 17 damdawi inah lut

Thenzawla damdawi in pahnih – Community Health Centre leh Integrated Ayush Hospital ah bekang tha lo ei vangin damlo enkawl mi 17 an awm.
Thenzawla Vantawng chanchinbu editor Liantluanga Renthlei sawi danin, bekang eisualtute hian an bekang um eisual hi tun Inrinni kalta zinga Thenzawl Bazara Kanghmun South khua atanga bekang um zawrh an lei a ni a, bekang an ei hnu hian an nuamsam lo zui nghal a, Pathianni tlai atang khan Integrated Ayush Hospital Thenzawlah admit an ni a, Thawhtanni zan thleng khan admit an la awm a, Ayush Hospital-a mi 11 inentir zingah he chanchin buatsaih lai thleng hian mi 9 enkawl mek an ni.
Thenzawl CHC-ah bekang eisualte hi Thawhtanni atang khan inentir awmin, hemi zan thleng hian mi 15 inentir tawhin, an zinga mi 7 chu damdawi peka haw tir leh an ni a, midang 8 chu damdawi inah awmtir rih an ni.
Bekang um eisual vanga Thenzawl damdawi in pahniha inentir hi he chanchin buatsaih lai thleng hian mi 26 an awm tawh a, damdawi ina enkawl 17 an ni. An kua a tha lo nasa hle a, khawsik leh luakten a thawk bawk.