Belgium-a hremna tuar tur Verstappen
Red Bull driver leh Formula One cham-pionship hmahruaitu ni mek bawk Max Versta-ppen chu gearbox change avangin Pathianni Bel-gian Grand Prix-ah hian hremna (five place grid penalty) pek a ni dawn.
Dutch driver hian Belgium ramah season kal laia a gearbox panga-na tur a hmang dawn a, chu chu dan ding laia season khat chhunga gearbox thlak phal chin vawikhata pel a nih tawh avangin hremna nen intlansiak a hmachhawn a ngai dawn a ni.
Red Bull chuan vawiin Spa-Francorchamps tlankawnga practice hunah hian an driver leh double world champion ni bawk Verstappen-a’n season kal laia a gearbox pangana tur a hman tur thu hi nemnghetin, thunei-tu lamin hremna an puang chawpchilh ve nghal a ni.
Spa tlankawng hi inlehpelh thlen tamna hmun niin, Verstappen-a tlankawng ngainat a ni a, nikum pawh khan engine penalty avangin 14-na daih atangin tlanchhuak mah se pakhatnaah a thleng tho a, chuvangin kuminah five place grid penalty hmu mah se a hnual phah teh chiam lo tura ngaih a ni!
Belgium ramah hian Red Bull chuan an record kawl lai belhchhah turin a zawna tum 13 chak an tum dawn a, an driver pahnih zinga a tu emaw zawk zawk pakhatna an nih leh theih chuan season kal lai bika an vawi 12 chakzawnna tur a ni ang a, season khat chhunga chuti zat chak zawn thei team hmasaber an ni nghal ang.
Verstappen hian intlansiak hnuhnung vawisarihah hnehna chang fei vekin, tun season-a tum 12 an tlanna turah hian a vawi 10-na’n lawmman semna dawhsan chungnung ber luah leh a tum dawn a ni – hremna tawk chungin!
Tarlan tawh angin, Dutchman hian kumina race vawi 11 zawh tawhah vawikua a chak ber tawh a, vawisarih chak zawn mekin, naktuk hian pakhatna a nih leh theih chan kum 2013-a Red Bull car bawk khalh chunga season khat chhunga chak zawn rei ber record siamtu Sebastian Vettel-a all-time record kha vawikhat chauhin a pha lo tawh dawn a ni.
Karliamta Hungarian Grand Prix-ah khan Red Bull chuan Formula 1 championship race-ah a tum 12-na atan hnehna an chang zawn tling chiah a, kum 1988 daih tawha McLaren record an khum fel chiah a ni.
Driver standing lamah ding takin hma a hruai kal mek a, amah hnaihbertu leh a Mexican team-mate ni bawk Sergio Perez lakah point 110 zetin hma a hruaifal mek a ni.
Belgian Grand Prix hi kuminah sprint event zinga pakhat niin, vawiin sprint bikah hi hi chuan Verstappen-a grid penal-ty hi kalpui a ni lo ang a, naktuk atan hremna hi a pek chauh tur a ni.
Belgium-a hremna tuar tur Verstappen
