Real Madrid midfielder Jude Bellingham chuan Spain a pan fuh bawk a, khawvela infiamna kaihhnawih chawimawina sang an semchhuah thin pakhat 2024 Laureus World Sports awards zinga pakhat Breakthrough of the Year award a dawng.
England international Bellingham hian Borussia Dortmund atanga Real Madrid a pan hmain Birmingham City-ah a career a tan a; kum 20 mi lek la ni chungin a club thar Real tan a season khatna a hman mekah La Liga goal 17 a thun tling der tawh a; tun Pathianni zan El Clasico-ah Barcelona an hnehna goal khung lehin, karliamta mai khan penalty shoot out hmanga Manchester City hnehin a team chu Champions League semi-final a luhpui fel tawh bawk.
He English mihang midfeilder hi Spanish giants chuan nikum nipui insuan hun lai khan Dortmund atangin pound maktaduai 89-in an leichhuak a, an star star player hnaivai Karim Benzema leh Cristiano Ronaldo-te chhuah hnua an innghahna lian a ni zui nghal.
Laureus World Sportsman of the Year award atan tennis player Novak Djokovic thlan niin, Serb hian he chawimawina ngaihhlut hlawh hi a tum ngana atan a dawng a; Spain leh Barcelona midfielder Aitana Bonmati chu women’s award dawngtu a ni thung.
Hmeichhe Ballon d’Or award kawltu ni mek Bonmati hian a club vawn lai chu season liamta 2022-23 khan Liga F bakah Spanish Cup leh Women’s Champions League title a lakpui.
2023 Women’s World Cup-ah Spain a champion-pui a, Madrid khawpuia Laureus ceremony-ah hian Barcelona hmeichhe team chu team of the year award a dawnpui bawk.
Bonmati chuan hmeichhe footballer zinga Laureus women’s award dawng thei hmasaber a ni chu dangdai a tih thu sawi chungin Laureus women’s team award dawng thei hmasaber zinga a tel bawk avangin an team chu an inchhuang hle tih a tarlang tel.
Bellingham kutah Laureus breakthrough award
