Bengal CM-in SC-ah SIR khinna petition thehlut

Bengal CM-in SC-ah SIR khinna petition thehlut
West Bengal Chief Minister Mamata Banerjee chuan Election Commission-in electoral roll Special Intensive Revision (SIR) a kalpui khinna chu court sang berah a thehlut a, Pathianni khan writ petition hi a thehlut a ni.
Bengal-ah hian kuminah assembly an inthlang dawn a, SIR kalpuia final voter list hi February 14-ah tihchhuah a ni tawh dawn a. SIR chungchanga Trinamool Congress kaihhruai state government leh Election Commission inbeihna nasa tak a awm mek laiin chief minister hi a che chhuak a ni.
Petition hi ‘Mamata Banerjee v. Election Commission of India’ tih niin inthlan buaipuitu pawl leh an state-a Chief Electoral Officer chu chhangtu tur (respondent) an ni dawn a. SIR hi state thlan bikah voter list finfiah nan, awm nawn paih nan, a awm thei lo awmte paih nan leh a dik lo siam that nan tia Election Commission hian a kalpui a ni.
Banerjee-i hi Pathianni chawhnu khan Delhi thlengin inthlan buaipuitute chu politic-a tan lam nei, mi mal thuneihna ang hawia che leh Representation of the People Act leh a kaihhnawih dan bawhchhiaa a puhin SIR kalpui khinna hi a thehlut a ni.
SIR chu National Register of Citizens (NRC) nena inzul reng, vote nei tur dik takten an neih theih lohna tura thil tihna, a bikin upa, rualbanlo, pasal an neih avanga an hnam hming thlak te bitumna niin a sawi.
Ni ruk liam taa Chief Election Commissioner Gyanesh Kumar-a hnena lehkha a thawnah pawh Banerjee-i hian SIR kalpui chu thil hautak lutuk intihtirna, insawisakna tia sawiin hna thawh nasat lutuk avana stress, anxiety leh intihlum 140 an awm phah tawh niin a sawi.
Petition a thehluha hian a hma pawha a dik lohna a sawi fo angin West Bengal-a micro-observer 8,100 ruat chu ‘dan lova ruat’ leh inthlan danin thuneihna a pek piah lam a nih thu a tar lang leh.
Bannerjee-i ang bawkin SIR kalpui hi mi tam tak, a bikin sorkar laipui eptuten an sawisel nasa hle a. Hetih lai hian inthlan buaipuite erawh chuan kalpui ngei tur leh electoral roll ‘thianghlim’ a awm theih dana dan anga tih ngei niin an sawi a. Voter lem paihna a nih rualin tumah tan bik emaw, tel thei tel lohna tur chhan engmah awm lo niin an sawi thung.
Bengal bikah hian eptu, BJP chuan Trinamool sorkar hian thawktute a thawhpui tha tawk lo va, voter ni thei lo tam tak humah an puh ve mek tho bawk.
Chief minister petition thehluh hi Supreme Court chuan a ngaihtuah thuai rin a ni a, Election Commission pawhin sawi duh a neihte chu kar thar tir lamah an sawi ve beisei a ni.