West Bengal-ah hian Nilaini khan a thawn hnih nan assembly inthlanah bial 142-ah vote thlak a ni a, candidate 1,448 awmin an zingah Chief Minister Mamata Banerjee-i pawh a tel.
Banerjee-i hian Trinamool Congress (TMC) sorkar term lina din tum a ni a, Bhabanipur bialah BJP atanga ding, Suvendu Adhikari nen an inkhing.
Bial 152-a vote thlak thawh khatnaah khan vote a tla tha hle a, 92.72% zet niin ram indan hnua vote thlak tam ber tum a ni a. Result hi May 4 hian state leh union territory dangte nen puan a ni ang.
Thawh hnihnaah hian candidate 1,448 an awm a, heng zinga 1,228 chu mipa niin hmeichhia 220 an tel a. Candidate langsar zingah Banerjee-i leh Adhikari-a bakah Firhad Hakim an tel.
Vote nei nuai 3.22 chuang an awm a, mipa nuai 1.64 leh hmeichhia nuai 1.57 leh third gender 792 an ni.
Chief minister dinna hi nikuma hnehna a channa hmunah a ding leh a. Bhabanipur leh Nandigram-ah pawh a lo ding tawh a, Nandigram-ah Adhikari a hneh lo va. Tun tumah hian BJP hruaitu hian Bhabanipur-ah TMC hotu hi a bei leh a ni.
Bengal-ah hian inthlan boruak a tang hle a. T thawh hnihna neih hmaa venhimna tihchakna kalpuiah mi 2,473 man an ni tih election commission thuneituin a sawi a. Thawhtanni zan thleng khan mi 809 man nin, Thawhlehniah a pung hle a, mi 2,473 an tling tawh tih a sawi a. Man zinga a tam zawk hi buaina siam an ni.
Bengal inthlanpuiah hian BJP-in nasa takin an campaign a, Prime Minister Narendra Modi, Union Minister Amit Shah, UP Chief Minister Yogi Adityanath leh hruaitu lawk eng emaw zatin rally leh roadshow an huaihawt a ni.
BENGAL INTHLAN: A thawh hnih nan bial 142-ah vote thlak
