BENGAL INTHLAN: BJP-in candidate tur 111 puang leh

BENGAL INTHLAN: BJP-in
candidate tur 111 puang leh
West Bengal assembly inthlan lo awm turah BJP chuan Ningani khan an candidate tur mi 111 awmna list pahnihna an tichhuak a, bial 294 awmah rorel lai, Trinamool Congress (TMC) nen an inbei dawn hle tih a lang mek zel.
BJP-in candidate tur an puan tharah hian Rekha Patra-i chu Hingalganj (SC)-ah a ding dawn a, Khardaha bialah Kalyan Chakraborty, Sonarpur Dakshin bialah Roopa Ganguly te an ding ang.
Party hian Mathabhanga bialah Nisith Pramanik, Chopra bialah Shankar Adhikari, Barrackpur bialah Koustav Bagchi, Kamarhati bialah Arup Choudhury te an dintir dawn bawk.
Candidate puan taka hming langsar zingah Priyanka Tibrewal chu Entally-ah a chuh dawn a, Tapas Roy chu Maniktala bialah a chuh bawk ang.
BJP hian a hmain candidate 144 an lo puang tawh a. A hmasaah hian Leader of Opposition Suvendu Adhikari-a chu kum 2021-a Mamata Banerjee-i a lo hneh tawhna, Nandigram-ah a ding leh dawn a. Hemi tum hian Bhabanipur bialah thlan tlin a ni bawk a, tunah erawh TMC bial a ni tawh rih.
Candidate dang puan tawhah Asansol Dakshin bialah BJP MLA Agnimitra Paul, Shibpur bialah lemchang thiam, politic khel ta Rudranil Ghosh leh Chakdaha bialah Bankim Chandra Ghosh te an ding ang.
West Bengal assembly inthlan turah hian thawh hnihin, April 23 leh April 29-ah vote thlak a ni dawn a, May 4-ah vote chhiar a ni ang.
Election Commission of India (ECI)-in ruahmanna a siam dan chuan bial 152-a a thawh khatna inthlan turah March 30, 2026-ah hriattirna tihchhuah a ni ang a, chuh tum tan April 6 thleng hming pek theih a ni ang a, April 7-ah endikin April 9 thleng inhnuhdawh theih a ni ang a, April 23-ah vote thlak tur a ni.
Thawh hnihna atan bial 142-ah inthlan tur niin April 2, 2026-ah hriattirna tihchhuah a ni ang a, April 9 thleng chuh tum tan hming pekna hun a ni ang a, April 10-ah endik a ni ang a, April 13 thleng inhnuhdawhna hun hawn a ni ang a, April 29-ah vote thlak a ni ang.