BENGAL INTHLAN: Didi bân tum lohna karah a kaihhruai thin, Suvendu-a CM hun a hnai

West Bengal chief minister, Didi tia an sawi mai, Mamata Bannerjee-i chu Prime Minister Narendra Modi-a kaihhruai BJP-in an state inthlanpuia an hneh hnuah ‘chak lo an la ni lo’ tih sawiin a nihna atanga a bân dawn loh thu a sawi a. Hetih mek lai hian hnehna changtu, saffron party chuan a kaihhruai thin, Suvendu Adhikari-a chu chief minister thar ni turin turin an sawi ri mek.
BJP hian kum 2011 atanga West Bengal-a thuneihna chang tawh, Chief Minister Banerjee-i kaihhruai, Trinamool Congress (TMC) hi Thawhtannia vote chhiarah khan bial 294 zinga hmun thuma thena hmun hnih aia tam lain an paih thla.
BJP hian khawchhak state, mihring tamna, Bangladesh ramria awm, West Bengal hi an la awp ngai lo va, tunah chuan India khawchhak state zawng zawng deuhthaw an thunun tawh avangin an tan chuan he hnehna hi politic-a mellung pawimawh taka ngaih a ni.
TMC hian a hmaa bial 215 awp thin kha tun tumah hian bial 80-ah chauh hnehna changin an tlahniam hle a, Banerjee-i ngei pawh a bialah a chak lo.
Banerjee-i chuan bial 100 vel chu an party chan tur ‘laksak luih’ an nih thu a sawi a, ‘tan lam nei’ tia a sawi Election Commission nen pawh an inhmachhawn a ngaih dawn thu a sawi a. A puhna hi finfiahna erawh a la sawi lo.
“Ka bâng dawn lo, hneh ka ni lo… official takin Election Commission hmangin anni (BJP) hian min hneh thei a; mahse, thinlung leh mi ngaihah inthlannaah kan chak a ni,” tiin thuthar lakhawmtute hnenah Thawhlehni khan a sawi a. Hetianga inthlana chak loh hnua chief minister bân duh loh hi India-a a vawi khat thlenna a ni.
West Bengal-a Chief Electoral Officer Manoj Kumar Agarwal-a chuan an puhna hi thil awmze nei lo niin a sawi a. Banerjee-i hnehtu, BJP hruaitu, Adhikari-a pawhin, “Danpuiah hian engkim a lang vek a ni,” a ti.
India danpui ang chuan state governor-in Banerjee-i hi a bân a phut thei a, a term tawp hun a nghak thei bawk a, chumi hnuah chuan MLA thlan tharte chu rinawmna thu tiamtira lak luh an ni ang a, sorkar thar siam a intan ang.
Banerjee-i term hi Ningania tawp tur hi a ni.
India-ah hian state inthlana candidate chak lo chuan court-ah result chu ⁠ei rukna, nomination emaw vote emaw pawm emaw hnawl emaw dik lo, candidate hnawl, emaw inthlan dan zawm lohna, result tichhe thei thilte hmanga chetna a awmin a thlen thei.
Banerjee-i hian court-ah a kal dawn em tih erawh a sawi lo.
Bengal inthlanah hian Modi-a leh Home Minister Amit Shah bakah BJP hruaitu hlun eng emaw zatin chawlhkar tam tak chhung campaign an nei a, Bangladesh atanga dan lova pem lut an tih leh Banerjee-i sorkar hnuaia tual chhung eibar dinhnum chhia te chu an au hla ber a ni.
Didi-i’n bân a tum loh thu a awm mek laiin hnehna changtu, BJP chuan amah hnehtu, Suvendu-a chu chief minister thar tur atan an hauh tawh nia sawi a ni.
BJP Legislative Party chu sorkar siam dan tur sawiho turin Zirtawpni hian Kolkata-ah an thukhawm dawn a. Hetah hian Adhikari-a hi an hruaitu atan thlan a ni dawn nia sawi a ni.
BJP state hotu, Samik Bhattacharya-a’n Adhikari-a hi hruaitu atan a rawt dawn a; Union Home Minister Shah-a’n legislative party hruaitu atan a puang dawn tih an sawi bawk.
Party-a a hniam ber thlenga hruaitu, state chhunga thawm na leh sorkar inkaihhruainaa hriat lar, Adhikari hi kumin inthlana BJP candidate-ah chuan a thawm na ber a ni.
Kum 2021 khan Trinamool chief leh Chief Minister Banerjee-i chu Nandigram-ah a lo hneh tawh a, kuminah pawh tun hmaa TMC-a a boss thin hi Bhabanipur bialah a hneh nawn leh a ni.