Durtlang Mel – 5 tlangval Hmingthanmawia Ralte (Valpuia) chuan Indian top flight Indian Super League (ISL) season kal laia Mizo player khel tha mar berte zinga mi a nihna chhunzawmin Nilainia ISL inkhel lianah Mumbai City FC tana goal ven hna a thawh mek chu mittlung takin a hlenchhuak leh a, an mikhual Bengaluru FC goal thun tur dangchattu pawimawh niin, Indian football-a club lian pahnih hi Mumbai khuaah goal awm loin an inhnehtawk.
Kum 24 mi Valpuia hi season liamta khan Mumbai City chuan I-League club Punjab FC lamah loan-in an chhuahtir a, Mohali khaw team tan tha taka a inlan hnuah ISL champion Mumbai City FC chuan hruaikirin, an head coach thar Petr Kratky rin a hlawh zui ta tlat a, ISL season kal lai 2024-25 kan thlir mekah hian Mumbai tan league match tinah la khel kim vekin, Mumbai City FC tan minute tin a la khel chhuak vek bawk!
Czech coach duhsakna hi chhan dang vanga dawng a ni lo a, manager a tlawn vang emaw thamna hmanga he dinhmun hi tawng chho ta pawh a ni lo a, a thawhrimna leh talent kawl tihpun zel vang liau liau a ni!
Kumin June thla tir lam khan Mumbai City FC chuan kum 2019-a an sengluh Valpuia contract an pawhsei thu puangin, an inremna thar ber ang chuan Mizo defender hian Islanders tan kum 2027 thleng a khel dawn a ni.
A tlan chakna leh thiamna hmangin Mumbai tlarhnunga a elpui dangte a nekchhuak a; goal venhim lama a thawhhlawk piahlamah mualsir atangin mual laia crossball vawrhluh kawngah fak a hlawh tel a, a pass a dik satliah a ni mai lo a, hla tak taka an pawlte ball pek dik kawngah a hriam tlat hi coach-te tan pawha duhsak loh theih lohna langsar a ni.
A ball pek fuh leh dik tak tak avangin tlarhma lama tlante’n goal zawn kawngah awlsamna tam tak an hmu a; ISL hmahruaitu Blues an mikhual tum pawh khan hmuhnawm thamin Valpuia a inlan leh a; hun bichilh, hlauhthawnawm leh hmanhmawhthlak tak tak kara ball pet thin an nih avangin defender-te tan dik zet zeta ball pet fuh reng theih a nih loh laiin Bengaluru game-a vawi 43 a pass zingah tum 36 ngawtin a tum tak a fuh a, a ball pass dik zat hi 84% a tling hial a ni!
Na taka ball pet ngaih huna chuti ang tak leh dik bawk sia ball chhuih thei Mizo player theihna hi tun season-ah Islanders hian ‘attacking’ atan an hlawkpui kal mek a; South Indian team khawng an mikhual tum pawh khan hla tak taka a pawlte awm tana vawikua ngawt ball a pekah vawili a hlawhtling a, hmun hla pass kawng a tihdikna percentage hi 44 a tling.
Kha game-ah khan a khel chhe lo bawk a, point 7.6 hmangin Valpuia hian rating hmu sang pahnihna a hauh pha hial a ni!
Nilaini away match-a point khat an hlawhchhuah leh hmangin ISL standing-ah khelh li atanga point 10 hum chungin Bengaluru khan hma an hruai chhunzawm a; game thum khelha draw vawihnih leh tlawm vawikhat nei tawh Mumbai-in table-ah 11-na an luah pha chauh thung!
Nilaini inkhelah kirleh ila.
Bengaluru FC goalkeeper Gurpreet Singh Sandhu kha Valpuia baka player langsar kan hmuh dang niin, kha goal-veng palian khan vawi duai lo home team goal tur a dansak a; chu’ng zinga pakhat chu a tir lam minute 13-na leka thleng niin, dinglam sir atanga defender tlanchhuak Hmingthanmawia cross ball vawrhluh kual kawi ngawk chu penalty area chhunga tan khawh Greek palian Nikolaos Karelis tauh phak tawk chiahin a kur hniam a, mahse, kan sawi mek Sandhu hian fuh zetin Karelis goal tur hi a danchahsak.
Captain Lallianzuala Chhangte hoin Mumbai City hian Sandhu hi fiah chhunzawm zauh zauh reng mah se a tawp thlengin India international hi an paltlang zo lo a; Bengaluru pawhin home team tlarhnung an supawp zo bik lo.
October ni 18 khian Bengaluru FC-in Punjab FC an tum leh dawn a, a tukah FC Goa hmachhawnin Mumbai City-in khelmual an lut ve leh ang.
Bengaluru leh Mumbai inhnehtawkna game-ah Durtlang defender Valpuia chetha leh
