Benzema 1st-half hat-trick hmanga chak Real
Real Madrid a zawm hnua a vawikhatna atan Karim Ben-zema chuan Bernabeu club tan first half chhungin hat-trick a siam a, goal thum khung tur hian minute sarih lek mamawhin, Pathianni zan Spanish La Liga inkhelah mualneitu Real-in 6-0 tehrengin an mikhual Real Valladolid an sawp.
He inkhela goal hmasa ber hi minute 22-a Rodrygo thun niin, darkar chanve khelh tlin dawnah Benzema hun a intan a, minute 36-ah goal thum thun tling hmanin, a hat-trick siamna goal pathum zingah hian ‘overhead kick’ tuihnai zet pakhat a tel nghe nghe.
Inrinni khan league hma-hruaitu Barcelona chuan 4-0 ngawta mualneitu Elche sawpin, pahnihna luahtu Real Madrid nen point 15-in an inthlau hman a, Pathianni zana Carlo Ancelotti team-in ankawtkaia point thum an hlawhchhuah ve leh tak avangin La Liga hma-hruaitu team pahnih inthlauhna hi point 12 bawkah a tla thla leh.
Tarlan tawh angin, Rodrygo chuan Marco Asensio chhawp-sak ball atangin Real hmahruai-na a tilut a; minute 29-ah Ben-zema chuan Vinicius Jr-a cross tha tawp thang hmangtangkaiin home team goal hnihna a thawh a; minute thum a liamleh rualin Frenchman bawk hian Vini-cius-a pass hmang bawkin a goal hnihna a tilut a; a hnu lawkah hnai set sawt atangin a hat-trick siamna goal chu overhead kick hmangin a thun leh a, Real tana first half chhunga hat-trick a puitlin vawikhatna a nih rualin April 1992 daih tawha Espanyol laka Real Madrid-in 7-0-a Espanyol an sawp tum minute ruk lek chhunga goal thum thuntu Fernando Hierro hnu lama La Liga game bika Madrid hat-trick siam rang ber a ni.
Ti hian, Benzema hian sea-son kal laiah league goal 14 thun tling tawhin, top scorer list kal mekah pahnihna a ni mek a, hmahruaitu Barca hmatawng Robert Lewandowski chu goal thum chiahin a pha lo tawh.
Bernabeu club goal hnih dang hi second half laihawl pelh leh hun tawp hnaiha Asensio leh Lucas Vazquez thawh a ni.
Kum 35 mi Benzema goal thumna leh Asensio goal tur siamsaktu Rodrygo chuan a goal hnihna tur khung leh bawk mah se Vinicius handball avangin Video Assistant Referee (VAR) chuan a hnawlsak a, a hnuah Rodrygo goal tur hi goal kham kualin a dansak bawk.
Point khat chauha tlak-hniam theihna hmun chhuahsan tawh Valladolid tana hun tha nei pahnih Roque Mesa leh Kike Perez-te’n first half leh second half-ah goal ban an tihper ve ve bawk.
Title race-a beisei nei tawh loa ngaih ni mah se Pathianni zan hnehna kha Madrid tan rilru lama chakna petu pawimawh a nih ngei a rinawm a, a chhan pawh Nilaini zan Copa del Rey semi-final second leg-a Barca hmachhawn tur an ni a, Pathianni zana chak kha rilru lama inbuatsaihna atan tihmakmawh a ni ang.
League hmahruaitu team nena game pawimawh khel tur an nih avangin boss Ancelotti chuan Pathianni zan inkhel tawp hmain a player pawimawh thenkhat chawlhahdam turin a lachhuak thei a, chu’ng zingah chuan Benzema leh Vinicius an tel a, tunhnaia khelhna hun chang tam thei lo player thenkhat Eden Hazard telin a luhtir bawk.
Nikum September hnu lama a vawikhatna’na La Liga game khel ve leh chiah Belgian Hazard hian hun pekbelha Vazquez-a goal tur a siamsak nghe nghe.
Elche 0-4 Barcelona
Inrinni zana La Liga hma-hruaitu team chakna goal hnih kha Poland striker Lewandowski thawh niin, season kal laiah a club tan league goal 17 a tilut tling ta.
He game-ah Nou Camp club goal hnih dang hi Ansu Fati leh Ferran Torres-te khung niin, Barcelona hian kum 2019 hnu lama anleague title hmasaber tur an hnaih deuh deuh zel.
Mualneitu team Elche kha season kal laia an manager palina lai ni tawh Sebastian Beccacece hnuaia an inkhelh vawikhatna niin, boss thar hnuaiah point an thawkchhuak zo leh ta chuang lo a, tlakhniam an hnaih zui zel.
Benzema 1st-half hat-trick hmanga chak Real
