Border Guards Bangladesh (BGB) chuan West Bengal leh Tripura-a India nena an inrina (international border)-a hmun tam takah ralthuam keng village defence volunteer-te a dah a, hei hi an thenawm ram atanga lehkha mumal nei lova lut danna tura beihpui a thlak mek leh khua leh tui an nih rinhlelhawmte thawn kir tura policy kalpui mek a nih laiin a ni.
Kar hmasa khan West Bengal leh Tripura-a hmun hrang hranga Border Security Force (BSF)-te chuan Bangladesh khaw mite chu ramria BGB sipaite pui leh West Bengal-a district pakuaa ramri hung hna thawh tan an vil lai vawi tam tak an hmu tih an sawi ve bawk.
BSF chuan West Bengal nena an inrina, Bangladesh ramri district-a Chapinawabganj, Thakurgaon leh Dinajpur-ah hetianga hmalakna hi a tam ber tih an sawi.
BSF hotute chuan Bangladesh-a heng district-a hmun tam takah Bangladeshi home ministry chuan an rama dan lova lut turte lo dang turin paramilitary force Bangladesh Ansar leh Village Defence Party an dah tih an sawi bawk.
BSF sipaite hian Bangladesh ramri khuaa silai keng khaw volunteer leh paramilitary force-te hmuh an nih thu hi an hotu sang zawkte hnenah an thlen tawh a ni.
“West Bengal leh Tripura-a inrinaah BGB tan volunteer a let hnih zetin an pung tih hmuh a ni a, BGB-in training an pe tih pawh an hria a. BGB hian khaw mite chu hunbi hran siamsakin darkar tin inchhawkin ramri an ventir a ni,” tiin BSF officer pakhat chuan a sawi.
Delhi-a BSF headquarters atangin engmah hemi chungchanga chhanna a la awm lo va. India hi Bangladesh nen km 4,096.70-a thui ramri nei a ni a, West Bengal-ah thui berin km 2216.7 a ni a. Ram pahnih sipaitehian an lam ve veah checkpost an nei a. India hian ramri dungah outpost 1,185 vel a nei a, kum tin BSF hian dan lova pem lut 1,500-2,000 inkar an man thin.
BGB-in ramria khaw mite training a pe leh ralthuam an kentir hi dan kalh ni lo mah se Indo-Bangladesh ramria thil awm dan ngaihtuah chuan tul vak lo anga ngaih a ni.
India leh Bangladesh hi an mite dan lova ramri kâna inpuh tawn nasa tak an ni a, a bikin West Bengal leh Assam-ah an tam zual.
June 7 khan West Bengal Chief Minister Suvendu Adhikari-a chuan state sorkar thar chuan an state atanga dan lova pem lut mi 4,800 vel a thawn let tawh thu leh mi 836 chu temporary detention centre-ah dah an nih thu a sawi a. BSF hnenah ramri hi kilometre 100 vel zeta thui hung turin ram a pe bawk.
Kar hnih kalta chhung khan ramria BSF leh BGB sipaite hi hmun hrang hrangah inhnial deuhna pawh an nei a, BSF-in ramri kân ru an hmuhte hruai kir leh turin an ti a, a hnuhnung ber chu Meghalaya-a Mahendraganj ramri-ah a ni.
BSF leh BGB hotute chu New Delhi-ah biannual conference an nei dawn a, Thawhtanni hian an tan ang.
BGB-in Bengal leh Tripura-ah ramri veng turin ralthuam nen khaw mite dah
