Bialtu MLA-in chhiatna endik
Hrangturzo bialtu MLA, adviser to CM Lalmuanpuia Punte chuan June 11 & 12 khan a bial chhunga tunhnaia khuarel chhiatna tuar khaw hrang hrang a tlawh.
Bungtlang khuaa leiminin chenna in a hnawl leh NHIDCL kawng siam avanga chhiatna thleng, leimin hlauhawm zual lai a enfiah a. Khawlailung Chekawn, N Mualcheng-a chhiatna thleng enfiahin, khawtlang hruaitute leh khuarel chhiatna avanga harsatna tawk kuthnathawktute nen an inkawm a ni. Leilet siamtute leh huan nghet nei mi engemawzatin tunhnaia ruahsurkha tuarin, an huan thlai leh leilet a tichhia tih an lo thlen a ni.
E Lungdar-a leilet neitute nen an inkawmnaah bialtu MLA chuan, tunhnaia ruahsur nasa chu Mizoramah Serchhip district-in a tuar nasa ber a, chu district-ah pawh a bial Hrangturzo chu a tuar nasa zual an ni tih a sawi a. Lui kawrte ringa leilet siam an tam avangin tuilianin kawrte leilet a thuah nasa a, leilet bakah tuikawng thlenga tuilianin a tih chhiat thu a sawi. A kaihhnawih sawrkar department-te nen tanghoin a chhawkna tur an ngaihtuah zel tur thu a sawi bawk.
Leng khua a tlawh bakah N.Vanlaiphai High School building chhia enfiahin, a cheithat dan tur leh hmalak zel dan tur khawtlang hruaitute a sawipui.
Bialtu MLA-in chhiatna endik
