BIHAR INTHLAN: Congress-in candidate tur 48 puang

BIHAR INTHLAN: Congress-in candidate tur 48 puang
Bihar assembly inthlan turah eptu, Congress party chuan Ningani zan khan an candidate tur mi 48 an puang a, Kutumba bialah state president Rajesh Ram an dintir dawn.
Congress-in candidate tur an puan thawh hmasa berah hian Bachawara bialah chuan Mahagathbandhan-a an thawhpui dang nen an inbeih a ngai dawn a, Left-in chuhtu tur an dah ve.
Aurangabad MLA Anand Shankar chu a bial ngaia ding tura tih a ni a. State Congress Legislature Party (CLP) leader Shakeel Ahmad-a pawh a bial ngai, Kadwa-ah a ding leh bawk ang.
Congress hian Hisua MLA Neetu Kumari chu an dintir leh dawn a, ani hi tun hnai lawka thuthar lakhawmtute hnena BJP zawm a duh thu sawitu kha ni mah se an thlem lungawi leh thei a ni.
Kum 2020 inthlana khan Kumari-i hian BJP atanga chuhtu, Anil Singh-a chu vote 17,000 chuangin a hneh a. Vote 94,930 hmuin Singh-a hian 77,839 a hmu ve thung.
Congress hminga a chuh hma hian Kumari-i hian kum 2015 inthlanah khan Samajwadi Party hminga chuhin vite 14,188 chauh a hmu phak a. BJP zawm tumin a awm hman a; mahse, a ding thei kher ang em tih a chiang lo a ni.
Congress hian Bihar-ah hian hmabak hautak tak an la nei dawn a. Prashant Kishor-a kaihhruai, Jan Suraaj chuan a vawi khat nan inthlan an chuh ve dawn avangin an vote tam tak an lak heksak rin a ni.
Bihar hi November 6 leh 11-ah inthlang tur niin lian takin BJP kaihhruai NDA leh Congress telna, Mahagathbandhan an inbei dawn a. BJP chuan an thawhpui dangte nena dinna tur bial an insema 101-a ding tur an puang kim tawh.
Mahagathbandhan-ah hian Congress bakah Tejashwi Yadav-a kaihhruai, Rashtriya Janata Dal (RJD) awmin an hotupa hi eptu tangrual hian chief minister atana an zawrh a nih hmel nghe nghe.
Hetih lai hian eptu tangruala tel, Mukesh Sahani-a kaihhruai, Vikasheel Insaan Party (VIP) chuan bial 15 chuh tura tihna an pawm ta a. Mahagathbandhan hian Rajya Sabha bial khat leh MLC bial hnih an chang turin an ti bawk niin an hruaitu hian a sawi.
Sahani-a hian bial dinna insem dan tura inremna siamtu, CPI (ML) hruaitu, Dipanka Bhattacharya chungah lawm thu a hrilh a. Congress MP Rahul Gandhi-a hnenah pawh lawm thu hrilhin ani hi RJD dawrtu a ni.
Bial dinna an inchan sem dan tur hi puan thuai rin a ni a. Hetih lai hian RJD chief Yadav-a chuan an party thatna, Raghopur biala chuh turin hming a pe lut tawh bawk.