aylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, e chart-ah hian a zawnin kar li chhung a No.1 tling ta. Hetihrual hian Gunna album tar ‘One of Wun’ pawh top 10-ah a debut.
Billboard 200 chart hi kar khat chhunga US-a album hralh tam dan atanga teha chart ranking siam thin a ni a, album hralh zat chhut nan hian album tak tak hralh zat bakah streaming atanga album tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin US-ah 2,60,000 an la hralh thei a, chung zinga 2,17,500 chu streaming atanga album hralhna tlukpui (on-demand official stream maktaduai 282.4) niin, album tak tak hralh chu 41,000 a ni a, hla mal ralhna atangin album 1,500 tlukpui a tling thei bawk.
Tihian Billboard 200 chart-a a album hrang hrang manga Taylor Swift a No.1 tawh zat chu kar 73 a tling ta a, soloist zinga he chart-a No.1 ni ngun ber a nihna a sawh nghet leh ta sauh a ni. Swift hi a naih bertu chu Elvis Presley niin, kar 67 a No.1 thei.
Guna album ‘One of Wun’ chu 91,000 hralhin No.2-ah a debut a, streaming atangin 90,000 (on-demand official stream maktaduai 118.52) niin, album tak tak hralh chu 1,000 a ni a, hla mal hralhna chu chhut tham a awm lo. Guna hian chart top 10-a lang thei album paruk a nei tling ve ta a, heng a top 10 album te hi top 5-ah an lang pha vek bawk.
Chart top 5 khartu album dang pathum te chu No.1 hlui vek niin, Morgan Wallen ‘One Thing at a Time’ chu 75,000 hralh lehin No.3 a la ni a, Future leh Metro Boomin ‘We Don’t Trust You’ chu 53,000 ralh lehin No.4-a bawk a la awm a, Morgan Wallen ‘Dangerous: The Double Album’ chu 44,000 hralh lehin No.7 atangin No.5 a kai thar leh ta bawk.
Noah Kahan ‘Stick Season’ chu 41,000 hralh lehin No.9 atangin No.6-ah a insawn a, chart No.1 hlui SZA ‘SOS’ chu 38,000 hralh lehin No.10 atangin No.7-ah a insawn thar leh a, chart No.1 hlui bawk Zach Bryan self-titled album chu 38,000 tling lo deuh hralh lehin No.12 atangin No.8 a kai thar leh a, Benson Boone ‘Fireworks & Rollerblades’ chu 35,000 aia tam deuh hralh lehin No.11 atangin No.9 a kai thar leh a, cart No.1 hlui bawk Beyonce ‘Cowboy Carter’ chu 35,000 hralh lehin No.8 atangin No.10-a a tawlh ve thung.
Billboard 200-ah thla khat chhung TTPD a No.1 ta
