Billboard Artist 100-ah Zach Bryan a No.1
Zach Bryan chu Billboard Artist 100 chart-ah No.16 atangin No.1-ah a invawrh a, he chart a vawi khat No.1-na a ni. Hetihrual hian Zach Bryan hi Billboard 200 (albums) chart leh Billboard Hot 100 (singles) chart-ah a No.1 bawk a, Billboard chart pawimawh pathumah tum khatah a No.1 vek thei a, mipa country soloist zingah hetiang ti thei pahnihna niin, Morgan Wallen hnung a zui ve ta a ni.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga US-a album leh hla hralh tam dan te, radio airplay leh streaming te chu tehna pawimawh a ni.
Zach Bryan hian a album thar ‘Zach Bryan’ leh he album-a hla te a hralh tha hle a, Billboard 200 (albums) chart No.1-ah a debut a, Kacey Musgraves nena an zai dunna ‘I Remember Everything’ chu Billboard Hot 100-ah a No.1 bawk a, he album-a a hla dang 15 te chu Hot 100 chart top 50-ah an lang vek bawk a ni.
Bryan hi kumina Artist 100 chart-a cpuntry act No.1 ni thei pahnihna a ni a, a pakhat zawk chu Morgan Wallen niin, kuminah kar riat a No.1 tawh a ni. Bryan hi country singer mipa zingah Artist 100, Hot 100 leh Billboard 200-ah te a ruala No.1 ni thei pahnihna niin, Morgan Wallen dawttu a ni bawk.
Zach Bryan sawi takah chuan, ani hi Oklahoma-ah investigation a tibuai tiin, Craig County Sheriff’s Office-in an man a, Zach hian police nen an inbeng-berek deuh chungchang hi social media-ah post-in, “Vawiin chu Oklahoma Highway Patrol nen kan inhnim hnai deuh a. Ka lo lungpuam deuh a, ka tawngkam hmanah te ka lo chhep sual deuh a ni. Dan leh thupek kengkawhtu te hi midang ang bawkin ka support a ni. A hunlai khan an lo lunghnur deuh a ni. Ka tih loh tawp tur a nia, thupha ka chawi e. Jail-ah min hruai a, ka mug shot te pawh a darh. He thil hi hnuchhawn theih tawh nise ka ti hle a, ka theihtawp ka chhuah ve tih min lo hriatpui bawk dawn nia. I love you guys, officer-te chungah thupha ka chawi takzet bawk e,” a ti.
Miley Cyrus chu No.22 atangin No.7-ah a invawrh a, ani hian a hla thar ‘Used to Be Young’ a hralh that zar a zo a, he ballad hi Hot 100-ah No.8 a kai a, Tyler, the Creator chu No.52 atangin No.8-ah a invawrh ve ta bawk.
Billboard Artist 100-ah Zach Bryan a No.1
