Birmingham City boss thar Rooney
Pathianni mai khan inhriatthiamtawnnain DC United nen an inthen a, Nilaini khan Birmingham City chuan an manager thar atan England captain hlui Wayne Rooney an senglut tih an puang.
Kum 37 mi England forward hlui hian Championship club-ah kumthum leh a chanve daih contract a ziak a, thla 15 lek teama enkawl hnua tunkar Thawhtannia Blues head coach a nihna atanga an petchhuak tak John Eustace a thlak ta a ni.
Everton leh Manchester United striker hi kumin July thlaa American neitu thar Shelby Companies Limited hnuai Blues a tlukluh hnua manager thar an sengluh vawikhatna niin, Rooney coaching staff turte zingah a England team-mate hlui leh England Under-21 assistant coach ni mek Ashley Cole bakah United lama a khelhpui thin John O’Shea kha an tel dawn a, O’Shea hi Republic of Ireland men’s national team-ah assistant coach hna chelh lai a ni nghe nghe.
DC United lama a luhpui Carl Robinson leh Pete Shuttleworth-te pawh kha Birmingham lamah hian Rooney backroom staff an ni zui zel bawk ang.
Tun hi MLS club leh Derby County lama boss nihna lo chelh tawh Rooney tan team a enkawl pathumna niin, a club thar tana a chetchhuah hmasakber hun tur chu October ni 21-a Middlesbrough an luhkhung tur hi a ni.
Blues co-owner leh chairman ni bawk Tom Wagner chuan an head coach thar fakin, hnehna chang ve tur renga piang a nih thu a sawi a, Rooney chu a coaching staff, club leh ansupporter-te puihnain ziankawng thara Blues hlangkaitu a nih ngei an beisei thu a tarlang tel a, a playing philosophy chu Birmingham City-in an ngeih ngei dawn niin a sawi bawk.
Inkhelh a bansan hnuah January 2021 khan Rooney hi Derby boss ni tura nemngheh niin, chumi hmain coach lailawk nihna an chelhtir.
Pride Park-a a khawsak chhung khan khelmual pawn lamah buaina neuh neuhin a tlakbuak a, chuti chungin a team enkawl chu point khat lekin Championship atanga tlak a pumpelhpui.
Kum 2021-22 khan a kahpah mai ni tawh loin manager nghet atana sengluh a ni a, mahse, Rams chu EFL dan bawhchhiat, sum lama talbuai leh transfer kalpui dan dik lo avangin ‘administration’ dinhmunah an tlulut a, point 21 paihsak chungin season an tan a ngai.
Dinhmun chhe tak leh point 20 chuang ba nghal ul chunga bul tan an nih avangin club talbuai Derby chu League One lamah an tlathla tur a dang zo ngang lo a; June thlaah Rooney pawh a chhuak a, a kalsan laiin a club enkawl chu ‘administration’ dinhmunah an la ding zui zel nghe nghe.
Washington khaw club DC United lama kum khat a khawsak hnuin England-ah bawk a kirleh ta a ni.
Birmingham City boss thar Rooney
