India chuan inthlak danglam a duh tia sawiin Congress president Mallikarjun Kharge chuan March 19 khan sorkar mek laiin ‘guarantees’ a tih te chuan kum 2004 a ‘India Shining’ slogan ang tho khan a hlawhchham ang tiin a sawi.
Congress Working Committee (CWC) meeting neih hnua press conference neih hnuah party leader K.C. Venugopal leh Jairam Ramesh te chuan CWC chuan Kharge chu Lok Sabha inthlan atana party manifesto final approval an pe tia sawiin tlangzarh hun tur pawh an bituk tawh tiin an sawi a.
“CWC chuan party guarantees te grassroot level a thlen theih nan roadmap an siam” tiin Venugopal chuan a sawi a.
Ramesh chuan Congress-in ‘ghoshna patra’ (manifesto) chauh ni lo ‘nyay patra’ pawh tichhuakin tichuan mipui ten hmalam hun eng an nei thei dawn a ni tiin a sawi bawk.
A hmain CWC meeting neihnaah Kharge chuan party leader te leh workers te chu party manifesto a tihchuhah tur issue tin te chu khawtin leh chenna In tinah thlentir ngei turin a ngen bawk a.
“Ramin inthlak dang lam a ngiat a ni. Tun sorkarin guarantees tia a chhuan em em te hi kum 2004-a an India Shining hlawhchham ang tho khan a hlawhchham ang” tiin Kharge chuan a sawi a.
“Kan zavaiin kan manifesto tena State tinah publicity tha thei ang ber an neih theih nan te chenna In tin a thlen vek theih nan mawhphurhna kan nei a ni,” tiin a sawi bawk.
Atal Bihari Vajpayee BJP sorkar khan kum 2004 Lok Sabha inthlanah ‘India Shining’ slogan an aupui a. Mahse, inthlanah an chak lo hle thung. Kharge chuan khawtina Congress worker te chuan chenna In tinah party manifesto chu an thlen tur a ni tiin a sawi bawk.
Congress president chuan manifesto a ziah lan te chu khauh taka tihhlawhtlin a nih tur thu a sawi a. “Manifesto a promise siam a nih hmain kalpui theih tur a ni em tih te uluk taka zirchian vek a ni” tiin a sawi baw a.
“A chhan ber pawh kum 1926 atang tawh khan Congress party manifesto chu ‘document rintlak’ anga ngaih a ni tlat a ni” tiin a sawi bawk.
Kharge chuan Rahul Gandhi kaihhruaia Bharat Jodo Nyay Yatra chu fak bawkin chu mi hmang chuan Congress te chuan ram mipui te ngaihven hlawhin mipuite harsatna dik tak hriat theih phah a ni a ti bawk a.
“Politican yatra satliah a ni lo va, kan political history-a mass contact movement lian ber a ni. Kan hun laiin khatiang khawpa turu kha tumahin an kalpui lo tih chu hai der theih a ni lo. Yatras hmangin mipuite harsatna tak tak te chu national centre stage ah hlankai a ni” tiin Bharat Jodo Yatra leh Nyay Yatra chungchang a sawi bawk.
Meeting neihnaah hian party chief hlui Sonia Gandhi leh Rahul Gandhi te pawh telin senior leader dang Ambika Soni, Priyanka Gandhi Vadra, P. Chidambaram, Digvijaya Singh, Ajay Maken leh Kumari Selja te pawh an tel a. Congress party manifesto chu P. Chidambaram kaihhruaia buatsaih a ni thung.
Congress party chuan Lok Sabha inthlan chu ‘five nyay’ (justices) – ‘Bhagidari Nyay’, ‘Kisan Nyay’, ‘Nari Nyay’, ‘Shramik Nyay’ leh ‘Yuva Nyay’ hmathehin a bei dawn a, guarantees 25 awmin nyay tinah guarantee panga zel a awm a ni.
Congress te hian Lok Sabha poll atan candidate tur mi 82 an puang tawh bawk a. CWC meeting chuan a bak pawh an chingfel tura ngaih a ni.
BJP guarantees hlawhchham dawn ti
