BJP-in an hruaitu 35 hnawtchhuak

Madhya Pradesh-a BJP party hruaitu thuawih lo 35 te chu hnawhchhuah an ni a.
Heng mi 35 te hian candidate nih tumin nomination an file a, mahse state chhunga party hruaitute chuan an nomination lo file tawh chu hnukkir leh turin an hrilh a, an hnuhkir duh loh avangin party atangin an hnawtchhuak ta a ni.
“Madhya Pradesh Assembly election lo awm turah party-in candidate tur atana a ruat te dodal zawngin mi 35-in candidate nih tumin nomination an filed ve a, hei hi party dan kalh tlat a ni. Hetiang hi a lo nih tak avangin a chunga hming kan sawi tak te khi kum ruk chhung atan Madhya Pradesh BJP President VD Sharma chuan party atangin a hnawtchhuak ta a ni,” tiin State BJP thuchhuah chuan a sawi a ni.
Hnawhchhuah langsar deuh te zingah – Bihar Singh Solanki, Rustam Singh, Kakesh Singh Gurjar, Munna Singh Bhadauria, Mamata Meena, KK Srivastava, Ghasiram Patel, Karan Lodhi, Nandram Kushwaha leh midang te an tel a ni.
He thil thleng hi Congress Party ten an hruaitu 39 party atanga kum ruk chhung atana an hnawhchhuah hnu lawka thil thleng niin assembly election lo awm turah party official candidate angin kum ruk chhung chu inthlan an chuh ve thei dawn lo a ni. Heng hruaitu 39 Congress atanga hnawhchhuah tak te hi State unit-a party lu ber Kamal Nath-a thu hmua tih a ni a. State Congress party thupuangtu sawi danin heng hruaitu hnawhchhuah tak te hian independent-in emaw Bahujan Samaj Party (BSP), Samajwadi Party (SP) leh Aam Aadmi Party (AAP) ticket emaw atangte in inthlan hi an chuh ve theih thu a sawi a ni. Party atanga an hnawhchhuah tak langsar zual deuh deuh te chu – Ex-MP Premchand Guddu, Ex.MLA Antar Singh Darbar (Mhow), Ex.MLA Yadvendra Singh (Nagod), State party spokesperson Ajay Singh Yadav (Khargapur), Nasir Islam (Bhopal North) leh Amir Aqueel (Bhopal North) te an ni. Madhya Pradesh Assembly seat-230 awmna inthlan hun hi November ni 17 niin vote chu December ni 3-ah state dang te ruala chhiar tur a ni.