BJP-in democracy humhim duhin Aizawlah kawng zawh

BJP-in democracy humhim
duhin Aizawlah kawng zawh
BJP Mizoram chuan Nilaini khan “Save Democracy Remove Anarchy” tih thupui hmanga kawng zawhin, Zarkawt Traffic Point atangin Vanapa Hall kawt thleng an zawh.
Central BJP atanga Mizoram in-charge Bhagwat Karad chuan, India ram democracy humhimna kawngzawh an nei thei chu a lawmawm a, Prime minister Modi kaihhruaina hnuaiah hmarchhak state chu nasa taka ngaihsak a ni a, amah ngei pawh Union minister a nih laiin hmarchhak state tlawh turin PM hian a ti a, a rawn kal thin tih a sawi. Chu’ngah chuan Mizoram mipui mamawh hrang hrang a rawn hmu ve a. Mizoram chu central-in a ngaipawimawh a, hnam tlem kan nih avangin kan ram leh hnam himna atan Bangladesh ramri hung a ni a, dan loa Mizorama lut tur an awm lohnan central chuan a hung sak tih a sawi a ni.
Mizoram-in kawng hrang hranga harsatna a tawh leh kuthnathawktute, a bikin sawhthing chingtute tan hma thar laksak a duh tih a sawi a. Sawrkar tawh leh sawrkar mek pawhin harsatna tak tak an sutkian sak thei loa, a sukiang tur leh market zau zawk an neih theihnan theihtawp a chhuah dawn tih a sawi bawk.
“Chu mai niloin, thalai hna zawng mekten hna an hmuh theihnan central-ah theihtawp chhuahin hma ka lakpui dawn che u a, vawiin atang hian kum 2028-a Mizorama inthlan awm turah inbuatsaih ila, development dik tak a thlenna atan mipuiin BJP min thlawp turin ka sawm a ni,” Bhagwat Karad hian a ti.
BJP State president Dr K Beichhua, MLA pawin, Special Intensive Revision chu Mizoramah pawh tha leh tluang taka kalpui a ni a, India ramah phei chuan a kalpui tha ber pawl state an ni pha hial tih a sawi a. Mizoramah hian SIR kalpui a nih avang hian voter sing thum chuang (3.89%) vel paih an ni a. Heng vote paih hi a then chu hmundanga pem, mitthi tawh leh hmun khat aia tama vote nei an ni tih sawi.
“Mizorama vote paih zawng zawng leh India rama vote paih belhkhawma vaibelchhe 13-ah hian BJP voter tam tak an awm ve a, Congress vote chauh paih a ni lo, tih chu tupawhin kan hriatthiam ka ring. Amaherawhchu, ram leh hnam hmangaihna avangin dan dik taka SIR kalpui a nih theihnan BJP chuan huaisen tak leh dik taka vote nei theite chauhin vote an neih theihnan hma a la ta a ni. SIR hi BJP tih chhuah a ni loa, Congress sawrkar hunlaia an dan siam tawh a ni a, chutiang chuan India khua leh tui dik takten vote kan neih theihnan hma a la mai a ni,” a ti.
Democracy humhim a, tharum hmanga sawrkar paihthlak chu an do tlat a, democracy ang ngeia mipui duhthlanna kan zah tur a ni, tiin, chutiang humhim chu BJP chuan an tum ber a ni tih BJP Mizoram hruaitu hian a sawi.