BJP-in India danpui zirho

BJP-in India danpui zirho
BJP Mizoram chuan Thawhtanni khan “Samvidhan Gaurav Abhiyaan”, India Constitution zirhoin hun an hmang.
State vice president Vanupa Zathang IPS (Retd) chuan Indian Constitution hi khawvela constitution sei ber, kim ber a ni tih a sawi a. India rama cheng chitin, hnamtin huapzo tura duan niin, Indian Constitution hian kawng hrang hrangin mimal, pawl, hnam angin min veng tih a sawi.
“India ramah eng party pawh sawrkar se, Constitution hi Parliament-ah pawh, an duh ang anga siam danglam theih a ni loa, rorel lai party-te chuan an thu pass duh chu party mal anga an tam avang ringawtin siam danglam mai mai theih a ni lo tih sawiin, “Constitution thuhmahruai ‘Preamble’ hi paih theih a ni loa, Preamble-a ziak ho – rorelna dik, zalenna, intluktlanna, inunauna tih hi kan hnualsuatin kan tidanglam thei loa, hemi pel hian dan siam theih a ni lo,” a ti.
Samvidhan Gaurav Abhiyaan convener JB Rualchhinga pawhin India ram civil chawimawina sang ber ‘Bharat Ratna’ dawng tawhtu Dr Babasaheb Bhimrao. Ambedkar chuan caste-based inthlairhranna a duh lo hle a, hnam hnuaihnung zawkte dinhmun chawisan chu a thupui ber lian ber zing ami a ni tih sawiin, “Dr BR Ambedkar chuan Congress party-in politics a khelh thin danah lungawi lohna neiin casteism chungchangah Congress an inrawlh nasat thin avangin a sawisel fo thin,” a ti.
Article 370 nuaibo a nih hnuah dan intluktlanna Jammu & Kashmir-ah hman a nih tak avangin Architect of the Indian Constitution Dr BR Ambekar duhthusam a nih ngei a rinawm tih a sawi a. Citizenship (Amendment) Act chuan hnam hnuaihnung zawk dalit leh tribal dinhmun a siamthat avangin, hei hi a duh dan a ni a rin thu a sawi bawk
“Congress hian Article 356 chu a tih khawloh avangin India ramah emergency puan a lo ngaih phah tawh a. OBC, ST/SC te tan dan siamthat leh reservation siam hi Dr BR Ambedkar hmathlira hman chhoh mek zel a ni. BJP chuan 33% reservation hmeichhiate tana hman nise an tih pawh hi Ambedkar-a’n India ram chu politics-ah a kal thatnan leh chanvo tha mitinin kan neih theihnan tia a hmathlir a ni,” JB Rualchhinga hian a ti.