BJP-in president thar nei hnai, zau takin inrawn mek

BJP-in president thar nei hnai, zau takin inrawn mek
BJP chuan national president thar an nei hnai a, Bihar assembly inthlan hma ngeia neih hman an tum niin NDTV chuan a tar lang a, inrawnna pawh zau taka kalpui mek a ni.
Party chuan state inthlanm hi national president thar kaihhruainaa hmachhawn ngei an tum nia ngaih a ni a; mahse, chhan hrang hrang avangin mi thar hi an la nei mai thei lo thung.
A chhan lian tak pakhat nia sawi chu zau taka an inrawn vang a ni.
BJP leh an ideological mentor, Rashtriya Swayamsevak Sangh chuan mi pawimawh tak tak 100 chuang rawt chhin an nei.
Party chief lo ni tawh leh union minister hlun deuh bakah RSS leh BJP-a langsar zual deuhte chu an inrawn kual vek a, hun a duh lo thei lo.
A chhan lian dang leh chu September 9-a vice president inthlan lo awm tur a ni a. BJP hian he inthlan hi a ngai dawn tih an hre lawk bik lo va, thla hmasaa Jagdeep Dhankhar-a a bân thut avangin loh theih lohvin an hmachhawn a ngai a. Maharashtra Governor CP Radhakrishnan-a chu vawrh chhuakin a tlin ngei pawh a rinawm.
President thar neih mai theih loh chhan dang leh chu an state unit pawimawh tak tak – Gujarat, Uttar Pradesh leh Karnataka-a president tur tihfel phawt an duh a ni.
A hma atang tawhin BJP hian state chief hi a thar thlan tulnaah chuan national president thlan hmaa tihfel vek an duh tih an lo sawi tawh.
An party danpuiah pawh national president an thlan hmain state leh union territory unit 36 an neih zinga 19 talin presdent an thlan phawt a ngai a. Tunah hian state 28-ah an tifel tawh thung.
Uttar Pradesh, Gujarat, Karnataka, Haryana, Delhi, Jharkhand, Punjab leh Manipur-ah president thar an la thlang lo va. Punjab-ah hian working president erawh an ruat tawh.
BJP national president ni mek, JP Nadda hi January, 2020-a thlan kha niin kum thum hun a neih a hman zawh hnuah vawi hnih pawh sei a ni tawh.
A hmasa zawk hi kum 2024 Lok Sabha inthlan dawn vang a ni a, a dawt leh hi party chhunga chanvo insiksawi vang a ni thung.