BJP-in rorelnaah leh eizawnnaah
hmeichhe tan kawng hawng zau
– Lalremsangi Fanai
Sawrkar laipui leh an party bikah BJP chuan hmeichhiate an tel tam deuh deuhna turin kawng a hawn zau bakah nitin khawsak eizawnna leh inchhungkhurah hmeichhiate tana hamthatna a siam belh zel tih State BJP hruaitu Lalremsangi Fanai chuan a sawi.
BJP Mizoram Nari Shakti Vandan Adhiniyam convener, BJP State joint treasurer Lalremsangi Fanai chuan, hmasawnna kal mekah hmeichhia an tel a, thutlukna siamtu leh hruaitu an nih theih chu hmasawnna kawng dik a ni tih Prime minister Modi-a’n a sawi thu sawi chhawngin, ‘Nari Shakti Vandan Adhiniyam’ (ram rorelnaa hmeichhe tana seat zuah sak) hi thuneihna nena hmeichhiate dikna leh zahawmna tilangtu a ni tih a sawi a. Dan satliah niloin hmeichhe chakte tihchak lehzualna kaihruaitu tur a ni tih a sawi.
NDA-BJP kaihhruai sawrkar hnuaiah, hun rei tak atanga buaipui hlawh Women Reservation Bill chu Parliament in hnihin lungrual taka Lok Sabha leh State Legislative Assembly a hman turin Nari Shakti Vandan Adhiniyam – Constitution (108th Amendment) Act 2023 /Women’s Reservation Act 2023 a pass tih sawiin, ruling leh opposition party sawi loa lungruala pass bakah opposition pawhin a rang thei ang bera hman nghal an duhna khan women reservation – 33% (1/3) seat zuah a pawimawh zia a tilang tih a sawi a ni.
Bharatiya Janata Party chuan ram/ state/ tualchhung rorelna bakah an party chhunga rorelnaah hmeichhe tana seat zuahsak tul tiin, kum 1990 chho daih atang tawha hma an lo lak dan a sawi a. Hetiang atana hmeichhiate seat an pek tam tual tual lain, Congress leh a thawhpuiten chuan seat an pe tlem tial tial thung niin a sawi bawk.
“Hmeichhiate tana 33% reservation hi hmeichhiate tihlawmna atan maia kalpui a ni loa, hman hmana tih tawh tur, tih dikloh kan siamtha mai zawk a ni. Tun hmaa he bill pass tura sawi chiam chiam ringawt ni tawh lo, a taka constitution hnuaia hman tur a ni ta hi a hlu a. Bill pass satliah a niloa, hmeichhiate zahawmna, mipui aiawhna, ram hmasawnna atana hmeichhia tam zawk awm tul em em na a kawk a ni,” BJP Mizoram Nari Shakti Vandan Adhiniyam convener hian a ti.
PM Narendra Modi kaihhruaina hnuaiah hmasawnna nasa tak awm chhoin, hmeichhia – hmeichhe naupang, kuthnathawk, raipuar leh kum upa thlengin an tan scheme tam tak – zirna, hriselna, eizawnna, nitin khawsak leh inchhungkhur thil bakah a dangteah a kalpui hian kawng hrang hranga hmeichhiate telna kawng a hawng zau zel tih a sawi a ni.
“Nari Shakti Vandan Adhiniyam hi ram inrelbawlna hran kan neih hnua hmeichhiate political empowerment kawnga structural reform lian ber a ni. Hei hi mipui rorelna kalpui kawnga aiawhna zau zawk inhawng, hmalam kawng eng zawh chhoh zelna a ni,” a ti.
BJP-in rorelnaah leh eizawnnaah hmeichhe tan kawng hawng zau – Lalremsangi Fanai
