BJP nen inzawmna titawp
turin MNF kan phut – AAP
Tunhnaia Manipura thil thleng avangin Mizo mipui rilru a nat thu leh he buaina lo chhuahna chhan bul ber chu BJP a nih thu Aam Aadmi Party Mizoram president Andrew Lalremkima chuan a sawi a. MNF party chu BJP nen an inzawmna titawp turin an phut tih a sawi.
AAP Mizoram president chuan Kristianna in a tawrh mek lai leh nekchep a nih mek laite, hnam hnufual zawkten an tawrh mek laia Prime minister Narendra Modi leh a party an ngawi tlat chu a ram mi leh sate ngaihsak lohna lian tak leh ram mipui tawrhna ngaihthahna lian tak a ni tih a sawi a. Hetiang a nih laia ram hmangaih tak taka an ngaih MNF-in BJP kaihhruaina hnuaia meeting an neihnaa an tel ta mai chu hriatthiam har an tih thu a sawi.
Tunhnaia thil thleng duh loh vanga BJP Mizoram vice president hial a ban laia central lama BJP intlawnsiak party an la awm chu mak an tih thu te, Kristianna nekchep a nih lai leh kan unauten an tawrh mek laia BJP thawhpui duh party an awm leh, an ni nena inkungkaihna nei zawnga sawi tur party an awm chu pawi an tih thu a sawi bawk.
Mizoramah pawh BJP chuan hnam hnufuala an ngaihah thapui an thawh mek a, nakin lawkah hei hi Mizoram tan a la pawi thei tih Andrew Lalremkima hian sawiin, India dan pui zahna nei lo leh a mi chengte ngaihsak miahloa hetianga che duh sawrkar chu Mizoram, Kristian rama awm atan an duh lo tih a sawi a ni.
BJP nen inzawmna titawp turin MNF kan phut – AAP
