BJP leh a thawhpuite rorel dan hrechiangtu chu Kristian missionary-te leh kohhran hruaitute an ni a, BJP sawrkarna hnuaiah inthlan pawh a ralmuang leh dik taka neih theih a ni lo hial dawn tawh tih Congress vice president Lalnunmawia Chuaungo chuan a sawi.
Thawhtannia MPCC Campaign Committee-in Aizawla ‘India Ram Democracy Chhanna Rally’ an huaihawtah he Commitee chairman ni bawk Lalnunmawia Chuaungo chuan India ram democracy hi chhanchhuah a ngai a. Mizoram mipui pawhin tih tur kan nei ve a, MP inthlanah BJP dodal thei tur Congress candidate Pu Lalbiakzama kan thlan a ngai, tiin a sawi.
“BJP leh a thawhpuite rorel dan hrechiangtu chu kan missionary-te leh kan kohhran hruaitute an ni. BJP sawrkar hnuaiah hian inthlan hi ralmuang leh tawh lo hial dawn a. Tun MP inthlan hi dik lo taka hmachhawn pui min tum mek,” a ti.
Hindu nihna chawinun tumtu RSS leh VHP leh an political party BJP hi Hindu tam zawkin an duh lo a. Loneitu pawl hrang hrang pawh BJP lakah an lungawi lo tih MPCC hruaitu hian sawiin, BJP kaihhruai NDA paihthla theitu chu INDIA Block an ni a, dik taka kan inthlan chuan BJP hian an chak dawn lo tih inhria in, Congress chakna tihchhiat tumin an sum leh pai neih pawh Income Tax department hmangin an bei a. Congress party account 11 chu khawih chet theih loha an hren mek bakah sum tam tak an chhuhsak tih a sawi. Hetia an tih chhan chu, Congress party-in sum a neih loh chuan an campaign thei dawn loa, campaign thei loa siam an tum tih a sawi.
Tla mai tur nia inhria in, BJP hian an man theih theih an man mek tih a sawi bawk a. Arvind Kejriwal an man chhan chu, Excise Act-a Prevention of Money Laundering Act (PMLA) hnuaiah a ni tih sawiin, “Finfiahna engmah an nei loa, politic hmanruaah an hmang mai mai a ni. PMLA dan hi an hmangsual nasa,” a ti.
Modi sawrkar chu campaign laia an auhla ber thalaite tana hna siam leh ram pawna thalai thawnchhuah a hlawhchham thak a, sawi pawh an sawi ri ngam tawh lo tih Lalnunmawia Chuaungo hian a sawi. India ram thalai zaa 65 chu hna neilo an ni mek a, thalai hna neilote BJP sawrkar lakah an beidawng hle niin a sawi bawk.
BJP rorel dan hrechiangtu chu missionary leh kohhran hruaitu – Lalnunmawia Chuaungo
