BJP te seat neih pung

Bharatiya Janata Party (BJP) te chuan tun hnaiah Rajya Sabha seat 30 neih belhin heng zinga 20 chu chuhtu awm lova an neih a ni a, Thawhlehni February 27, 2023 khan Rajya Sabha seat 57 ah inthlanna neih a ni a.
Tihian Rajya Sabha-ah BJP te chuan seat 97 nei tain BJP kaihhruai National Democratic Alliance (NDA chuan seat 117 nei mekin House member 240 awmnaah majority mark 121 a phak lohna chu seat 4 chauh a ni tawh a ni.
April thlaah Rajya Sabha seat 56 chhuahsan tur awma inthlanna neihah BJP te chuan seat 30 an la a, seat 20 ah chuhtu awm lovin an tlang a, Thawhlehni khan seat 10 an la a ni.
State pathumah Rajya Sabha seat 15 inchuhna neihah cross-voting thlengin BJP ten seat 10 an lak phah a, Congress chuan seat thum la in Samajwadi Party ten seat hnih an la bawk. Karkalta khan candidtae 41 chu chuhtu awm lovin tlinga puan an lo ni sa tawh bawk.
BJP te chu che tha berin Uttar Pradesh-ah seat an lak belh a, Congress rorelna seat khat chauh awmna Himachal Pradesh-ah chakna an chang bawk.
Inthlanna neih a nihna chhan hi April 2 ah member 50 te chuan an term an hmang zo tawh dawn a, April 3-ah paruk dang an chawlh tawh dawn bawk vang a ni.
Inthlanna neih hmain ruling NDA chuan Upper House-ah MP 109 a nei a, Rajya Sabha member 238 awm mekah a zahve an phaklohna chu member 10 chauh a ni tawh a. Opposition INDIA bloc te chuan MP 89 an nei thung.
Biennel poll neih laiin Uttar Pradesh chuan seat ruak 10 a nei a, Maharashtra leh Bihar in paruk ve ve, Madhya Pradesh leh West Bengal in panga ve ve, Karnataka leh Gujarat in pali ve ve, Odisha, Telangana, Andra Pradesh leh Rajasthan ten pathum theuh leh Uttarakhand, Himachal Pradesh, Haryana leh Chhattisgarh ten pakhat theuh an nei bawk.
Thawhlehni tlaia inthlan result chhuah hnuah BJP chu Rajya Sabha a party lian ber ni zui zelin member 96 a nei tawh a, heng zingah hian nominated member panga an awm bawk a a ni. Congress te chu pahnihna niin parliament member 29 a nei a, Trinamool Congress in 13, DMK leh AAP ten member 10, BJD leh YSRCP ten pakua ve ve, BRS ten pasarih, RJD ten paruk, CPM ten panga, AIADMK leh JD(U) ten pali an nei a. NDA te chuan member 117 neiin majority mark 121 an phaklohna chu member pali chauh a ni ta a ni.