Bharatiya Janata Party te chuan New Delhi a party national council meeting an neihnaah Prime Minister Narendra Modi leadership chu fakin tun hnai kum 10 chhung a kaihhruaina hnuaiah ‘Ram Rajya’ a takin a thleng a ni, an ti.
He resolution hi ‘Viksit Bharat – Modi’s Guarantee’ tih niin Defence Minister Rajnath Singh-an pulutin Finance Minister Nirmala Sitharaman chuan a thlawp zui a ni.
Resolution pass a nih nana thusawitu zingah Uttar Pradesh Chief Minister Yogi Adityanath, party spokesperson Sambit Patra, leh BJP’s Jharkhand unit chief Babulal Marandi te pawh an tel.
Resolution chuan PM Modi-an kum sawm a sorkar chhunga hlawhtlinna hrang hrang sawiin – welfare atanga cultural nationalism, Article 370 nuai bo, Ayodhya-a Ram Mandir sak, retheihna ata mi vbch 25 khai chhuah te leh loneitute tan ‘Modi’s guarantee’ te chu sawi lan a ni a.
Resolution chuan na takin tun hnaia West Bengal-a sandeshkhali-a thil thleng chu demin hmeichhe Chief Minister awmna state-ah hmeichhiate zahawmna tihbawrhbanin a awm a, mihrinna zahthlak taka siamin a awm a ni, an ti bawk.
Resolution chuan kimchang takin PM Modi hnuaiah Ayodhya a Ram Mandir sak tumna hlawhtlin chhoh dan tarlangin PM Modi-an temple hlan thianghlim dawna religious rituals a tih te sanatan life atana example a siam te leh Lord Rama nena inzawmna nei temple hrang hrang a tlawhte tarlan a ni bawk a.
“Prime Minister Modi-an temple a sa mai a ni lo, tun hnai kum 10 chhungin Ram Rajya concept a kalpui a ni. Nakin lo la awm turah sawihona a awmin historians te chuan heng event te hi India civilizational heritage dinthar lehna kawnga chhinchhiahtlak tiin an la sawi ang,” tiin resolution chuan a tarlang bawk.
Parliament House thar te, Women’s reservation Bill pawm tak te, Space lama India hlawhtlinna te pawh resolution-ah chuan tarlan tel a ni bawk a.
“Prime Minister Narednra Modi chuan ram pum huapin Uttar Pradesh atanga Kashi Vishwanath Dham atanga Ayodhya, kum za bi nga hnua Lord Ram let lehna hmun thlengin hruaitu nihna a lantir a ni” tiin Adityanath chuan a sawi.
Defence Minister Rajnath Singh chuan loneitute tana Union government hnathawh sawiin Modi hnuaiah ‘Loneitute chu Prime Minister Modi chhungkua ang an ni,’ a ti bawk a.
Resolution chuan Opposition INDIA bloc te chu caste-based divisive politics kalpuiah puhin chu chu PM Modi an India rama caste pali – mirethei, loneitu, hmeichhia leh thalaite chauh a tih nen chuan a inkalh an ti bawk.
Sitharaman chuan India economy thang duang takah khawvel mit a fu tawh tia sawiin khawvel ram dang ten recession an tawh laiin India chu a thang zel a ni, a ti bawk.
Sitharaman hian Tamil leh Telegu-in PM Modi-an a ngenna angin thu a sawi thung.
BJP national council-ah hian palai 12,000 dawn awmin ni hnih chhung a awh a, Pathianni khan khar a ni a; a khar nan PM Modi chuan thu a sawi a ni.
BJP ten PM Modi an ‘Ram Rajya‘ kalpui ti
