BJP chuan India hmarchhaka tualto party lian deuh chu a kawppui vek a, chutah chuan MNF leh ZPM pawh an bang dawn lo tih Congress hruaitu Jairam Ramesh chuan a sawi a. BJP-in nuaibo a tum ngei tur, Mizote tana inhumhimna tha Article 371(G) venhim chu an thupui a ni tih a sawi. Lok Sabha inthlanpui atana Congress party-in hmachhawp a neih tlangzarh paha Mizorama rawn campaign, AICC general secretary Jairam Ramesh chuan, tun tum inthlan chu democracy leh India danpui hnuaichhiah duhtu leh vawnhim duhtute inbeihna a ni a, Congress chuan India rama cheng zawng zawng hi an hnam tih phung leh an sakhaw rinte a zahsak a, thlak thleng sak a tum ngai lo tih a sawi.
BJP chuan India hmarchhaka tualto party chu a thawhpui vek a, a lang leh lang lo pawhin a dah vek tih a sawi a. MNF leh ZPM pawh lang lo liama BJP hnuaia inphiar zawm vek tho an ni tih a sawi.
Congress party chuan Mizoram atanga central minister tura beihpui lam a buaipui loa, BJP-in a sawinghin mek India danpui leh Mizoram tan Article 371(G) humhim chu a thupui ber a ni zawk tih a sawi a ni.
BJP chuan India ram leh a chhunga chengte chu hnam khat, tawng khat, sakhaw khata chhunfin min tum a, Congress chuan India rama chengte hi anmahni kalphung zulzui veka kal a, indipdal si loa lungruala kal tir chu a tum ber a ni thung tih a sawi.
Free movement regime chu BJP sawrkarin kum 2018 a tih niin, anmahni vekin an tihtawp leh a; Myanmar nena inrina hung pawh, Myanmar ram dinhmun chiri lutuk chhuanlama hman a tum laiin, a bul ber zawk chu India ram chhunga thil thleng vang zawk a ni tih AICC hruaitu hian a sawi. Myanmar buaina chu thil thar a ni loa, BJP sawrkar chuan hei hi a ni lo zawnga kuai herin ram pawn lam thil thleng a chhuanlam ta daih tih a sawi a ni.
Manipur buaina chu BJP leh a sangawi zawnpui RSS, VHP leh a dangte ruahmanna vanga chhuak a ni tih Jairam Ramesh hian a sawi. Prime minister Narendra Modi chu thutiam tih hlawhtlin leh tur si loh hmanga hnam leh chi te a thuhnuaia dahkhawm a tumna lamah Manipur buaina pawh hi chhuak nia sawiin, Meitei, Zo-Kuki, Naga te a hrang theuha thu tiamin, hei hian an karah hem a thlak phah ta tih a sawi. Thla 11 an buai tawh chhungin inremna lam hawipui tumin vawikhat mah a hmunah a kalchilh loh bakah Manipur chief minister, central minister, minister, MP leh MLA te chu heti lam hawi zawngin vawikhatmah a kawm lo a, a thil tum dik tak zawk a hlawhtling mek tih a sawi.
Nikum MLA inthlanpui dawnah PM Modi hian campaign tura Mizoram rawn tlawh a tum chu a thulh leh thut a, a chhan ber pawh, Mizoram a tlawh chuan Manipur a tlawh loh khan chhuanlam tur dang a nei dawn loa, Manipur a tlawh duh si loh avangin Mizoram tlawh a tum pawh a thulh phah niin a sawi a ni.
Myanmar leh Mizoram kaltlanga insumdawn tawnna siam chu centre-a Congress kaihhruai sawrkar laia bul tan leh amah ngei pawh hma la tu a ni tih Union minister hlui Jairam Ramesh hian a sawi a. Hemi zinga ruahmanna – Sittwe Port pawhna tur kawngpui sial chu Prime minister Modi nena inhne hnai tak hnenah hna pek a ni a, a ni hian Myanmar tualchhung buaina avanga harsatna a tawh avangin a chhunzawm tha duh leh si lo, tiin, “Hei hi he project-in a tum ber phatsanna lian tak a ni,” a ti.
BJP thuhnuaiah MNF leh ZPM Art. 371(G) humhim kan thupui – Jairam Ramesh
