BJP tih loh party dang pathumin thawhpui nei

Village Council (VC) leh Local Council (LC) inthlan atan political party te’n theihtawp an chhuah mek a, an inzawm deuh put tiin a sawi theih ang.
BJP-in khawiah mah thawhpui an nei lo a, party dang pathum – ZPM, MNF leh Congress party-te chuan thawhpui an nei.
BJP-in candidate 195 an nei a, Local Council-ah pakua, VC-ah 186 an nei. Local Council-ah pawh VC-ah pawh party dang thawhpui an nei lo a, an dinna zawng zawngah an mal din vek.
“Khawiah mah thawhpui kan nei lo a, thawhpui neih tuma inbiak pawh a awm lo. Keimahniin kan mal din tawp mai,” State BJP president Vanlalruata chuan a ti.
ZPM, MNF leh Congress party te’n thawhpui an nei a, an inzawm kual deuh put. Mahse ZPM leh MNF hian tan dunna an nei lo nia hriat a ni.
Aizawl khawpui chhungah Local Council-ah MNF leh Congress party tan dunna a awm nual a, veng pathum velah an tang dun. VC-ah chuan an tan dun hmun a awm teuh tiin a sawi theih ang, hmun 20 vel nia hriat a ni.
Congress party hian ZPM nena tan dunna an nei nual a, Tuivawl bialah phei chuan khaw pasarih velah party pahnih hi an tang dun.
MNF leh Congress tan dunna a awm a, Congress leh ZPM tan dunna a awm bawk. BJP an mal din a, PC party leh AAP te’n candidate an nei lo.
Aizawl leh Lungleia Local Council-ah candidate 2076 an awm a, VC-ah candidate 6829 an awm.