Bank of India chuan Mizorama an branch pathumna turin Zirtawpni khan Bawngkawn Main Road, Lalzarliani buildingah Aizawl Branch thar an hawng a. NBG (East) general manager Manoj Kumar Singh chuan hawngin, Bank of India Guwahati zonal manager leh deputy zonal manager-ten an telpui bawk.
Bank of India hi 1906 September 7 atanga hawn a ni a, kum 1969 ah nationalised bank-a hlankai a ni. Tunah hian India ram pumah branch 5000 chuang neiin, khawmualpui 5-ah branch leh representative office an nei a, foreign branch 47 an nei mek bawk. Bank of India hi nationalised bank zingah ATM nei hmasa ber a ni.
Mizoramah kum 2011 atangin an inhawng tan a, tunah hian Zarkawt leh Venghluia Pi Pangi pengah branch an nei mek. Mizorama bank awm zingah loan pe chhuak tha ber pawl niin, an credit- deposit ratio pawh 100% chuang a ni. Loan hrang hrang bakah life insurance, motor insurance leh health insurance chu anmahni kaltlangin awlsam takin a tih theih a ni.
Branch thar hawngtu Manoj Kumar Singh chuan Bank of India chuan Mizo mipui tan theihtawp chhuah a inhuam a, Mizorama an staff-te pawh tualchhung mi vek an ni tawh a, Mizo mipui tan dawr an awlsam tih a sawi. Mizoramah branch tam zawk hawn an tum thu sawiin, nationalised bank an nih angin mipui huapzo tak leh mitin ban phak bank a nih thu a sawi.
BoI-in branch thar hawng
