Bomb hmanga inbumna avangin Kolkata airport chiai
Kolkata airport-ah pathianni khan passenger pakhat hnen atangin bomb puak thei a awm tih thu dawn a ni a, airport chhunga awmte an chiai hle.
Airport thuneitute chuan passenger pakhat chuan CISF leh IndiGO staff te hnenah Kolkata atanga Chennai pan tur IndiGo flight 6E 892 ah bomb nia rinhlelh a awm thu a sawi a, hei vang hian hun reivak lo chhung chu mipui an chiai hman hle a ni.
Thuneitute chuan he thil hi chhui chiang nghalin, airport gate number 18 bula thu passenger pakhat bag chhungah chuan bomb nia rinhlelh ber chu a awm niin an ngai a, Airports Authority of India (AAI) chuan an enfiah hnuah he bag hi IndiGo a hnathawk hmeichhe pakhat bag zawk a nih thu finfiahin, inbumna thil mai a nih thu an sawizui a ni.
Airport thupuangtu chuan hmeichhe bag-ah hian bomb a awm loh thu sawi chiang nghalin, rinhlelh bag nia sawi hi IndiGo airline-a thawk hmeichhe pakhat ta ngei a ni a, thudik lo report tu hi Agartala lam pan tur niin CISF in an hren zui nghal thu a sawi.
CISF lam pawhin he passenger hi Netaji Subhas Chandra Bose airport police station-ah an hlan hmain medical exam an neih phawt dawn thu an sawi zui ve bawk.
Bomb hmanga inbumna avangin Kolkata airport chiai
