India sorkarin Myanmar leh India inrina hung a tum a, MZP chuan hei hi theihtawp chhuaha dodal an tum. Central YMA pawhin India sorkar thil tum hi an duh lo.
“Theihtawp chhuaha dodal kan tum a, a tawp thlenga theihtawp chhuah kan tum. India sorkar hian he a thil tum hi a thulh pawh kan beisei a, ti lo turin kan ngen a ni,” MZP president H Lalthianghlima chuan a ti.
MZP hian prime minister hnenah border fencing an duh loh thu hi ziakin an thlen tawh a, Mizoram chief minister sawipui an tum bawk.
“Tuna India leh Myanmar inrina an tih hi keini chuan kan pawm lo a, kan ram min thendarhna zawk a ni a. Chuvangin lo hung hi kan duh lo,” a ti.
“Kan unaute nena kan inkalpawhna tihpin an tum tihna a ni a, hei hi kan duh lo a ni. Hnam khat, unau kan ni a, khawvel politics vir velin ram pahnihin min then a ni mai a, kan inkalpawhna leh zel tihchhiat kan remti lo a ni,” a ti bawk.
India sorkar hmalakna an ngaihchan thu a sawi a, MZP chu a dinna ngaiah a ding tih sawiin, India sorkarin a tum tak tak a nih chuan a theih ang anga dodal an tum thu leh theihtawp chhuah an tum thu a sawi.
Central YMA pawhin border fencing an duh loh thu an lo puang tawh a, chief minister an sawipui tawh bawk.
Central YMA hian India leh Myanmar-a Zo hnahthlakte zalen taka an inkalpawhna tawn theihna Free Movement Regime tihbo tumna hi tha an tih loh thu January ni 8 khan thuchhuah hmangin an puang a ni.
“Thuchhuah kan siam a, chief minister hnenah kan thlen tawh bawk a. Central YMA chuan India sorkar hmalakna a ngaichang,” Central YMA general secretary Prof Malsawmliana chuan a ti.
“Zo hnahthlakte inkalpawhtawnna tihbo tumna a ni a, chuvangin YMA chuan hei hi tha a ti lo a, Zofate inpumkhatna a nghawng ang tih a hlau a ni,” a ti bawk.
Border fencing dodal tum
