Boruak bawlhhlawh vangin khua a lum

Tunlaiin khua a lum a, thenkhat phei chuan phai khaw lum ang mai a ni te an ti. A lum dan a chiang a, a chang rawt tiin a sawi theih ang.
Khaw lum dan hi, ni a sa vawl vawl a ni chuang si lo a, ni sa a chiang pawh a ni lo. Ni a lang chiang kak lo a, mahse khua a dur leh chuang si lo. Mizoram Pollution Control Board (MPCB) lam chuan tuna khaw awm dan hi boruak bawlhhlawh vang an ti.
“Ni a lang chiang kak lo a, van hi a paw chuk mai a. Boruak bawlhhlawhin min tuam a, chu chu khaw lum chhan hi a ni a, greenhouse effect an tih hi a ni,” MPCB member secretary Er C Lalduhawma chuan a ti.
“Boruak bawlhhlawhin min tuam a, ni lum rawn thleng kha a chhuak leh ta lo a, silpaulin hnuaia awm ang deuh hi kan ni,” a ti bawk.
Boruak bawlhhlawh a lo awm chhan thil langsar chu, Mizoramah chuan bawlhhlawh hal te, lirthei khu te a nih thu te a sawi a, Krismas leh kumthar lawm laia halpuah leh halmawi hal nen a inzawm lo thei lo tih a sawi bawk.
Krismas leh kumthar lawm lai vela halpuah leh halmawi hal khu (gas) kha khawiah mah a kal dawn chuang lo a, kan chung zawnah a zam vel a ti. MPCB chuan bawlhhlawh hi hal loh ni se an duh tih a sawi a, bawlhhlawh hal thin an la awm bakah hnatlan nikhuaa bawlhhlawh hal hi sim tul an ti tih a sawi. Lirthei khu pawh Mizoramah chuan boruak tibawlhhlawhtu langsar a nih thu a sawi a, “Chuvang chu a ni a, pollution test hi a tul a, keimahni tan bawk a ni. Motor kan ngah a, tin, kan hmang lo thei lo a, mahse khu a tihchhuah turah danin a phal chin a awm a, chu chu ngaih pawimawha test hi a ngai kan ti,” a ti.
Ruah a sur chuan min tuamtu boruak bawlhhlawh hi a tleng fai thin a, Mizoram chu ruah tui tamna a nih avangin, ruah a’n sur a, kum tluana Mizoram dinhmun thlirin kan boruak a la thianghlim kan ti leh mai thin tiin a sawi a, ruah sur loh laiin boruak kan tibawlhhlawh tih a lo lang tih a sawi bawk.
Kuminah ruah a sur har a; State Meteorological Centre-in an chhinchhiah danin, kum dangah January leh Fabruary-ah pawh a sur thin laiin kuminah chuan a sur lo. March ni 16-ah a vawi khat nan a sur chauh a, vawiin thlengin ruah tui hi a la tam lo.
Boruaka bawlhhlawh leng vel, hip luh theih chin vela leng RSPM a leng a, MPCB-in an teh danin March thla tluana Bawngkawna RSPM leng hi a nasat ber laiin 232 µg/m3 a ni a, a zia ber laiin 201 a ni. Dawrpui-ah a nasat ber laiin 247 µg/m3 a ni a, a zia ber laiin 155 µg/m3 a ni. 60 µg/m3 aia sang lo hi mihring tana him chinah ngaih a ni.
MPCB member secretary Er C Lalduhawma chuan RSPM te, Nitrogen dioxide te, Sulfur Dioxide te, mihring hip luh theih tawk vel leng boruak bawlhhlawh hi a nasatin hrileng, awm na, khawsik, thawk lama harsatna te a awm thin a ti a, chu chu kumthar lai vela halpuah leh halmawi hal loh an duh chhan ber pakhat pawh a nih thu a sawi.