Box office-ah Barbie a No.1
Greta Gerwig film siam ‘Barbie’ chuan tun weekend kalta khan North America-ah cinema hall ticket hralhna atangin dollar maktaduai 155 a la lut a, North American box office No.1 a ni. He film hi hmeichhe lamin an lawm lehzual a, opening weekend-ah hian dollar maktaduai 90 vel lalut thei turin an chhut a, mahse, beisei phak bakin a che tha ta zawk a ni.
Barbie hi US pawn lamah pawh a che tha hle a, ram hrang hrang 70 atangin dollar maktaduai 182 a lalut bawk a, tihian opening weekend-a a lakluh zawng zawng chu dollar maktaduai 337 a tling ta a ni. He film siam nan hian dollar maktaduai 145 vel an seng a, an sum sen chu an hmuchhuak nghal chiang hle.
He film hian North American box office-ah record a siam a, hmeichhe direct film tlangzarh tawhah North America-a opening weekend-a sum lalut hnem thei ber a la ni. A hmaa he record siamtu chu Patty Jenkins direct ‘Wonder Woman’ kha niin, 2017-a an tlangzarh khan opening weekend-ah dollar maktaduai 103.3 a lalut thei a, he record hi Barbie hian a rawn khum chiang hle a ni. He film hi kumina film tlangzarh tawh zingah opening weekend-a US-ah sum lalut hnem ber a la ni bawk.
Barbie film hi Margot Robbie leh Ryan Gosling te channa a ni a, anni pahnih tan pawh an film chan tawhnaah opening weekend-a sum lalut tam ber a ni ve ve bawk.
J Robert Oppenheimer chanchin behchhana historical drama an tlangzarh thar ‘Oppenheimer’-in dollar maktaduai 80.5 lalutin box office No.2-ah a debut. J Robert Oppenheimer hi physicist niin, atom bomb siam chhuahnaa a sulsutu pawimawh tak a ni. He film pawh hi biographical film-ah chuan North America-a opening weekend a sum lakluh tamah pathumna a ni a, American Sniper (dollar maktaduai 89.3) leh The Passion of the Christ (dollar maktaduai 83.8) te chiah a pha lo.
‘Oppenheimer’ hi US pawn lamah pawh a che tha thawkhat a, ram hrang hrang 78 atangin dollar maktaduai 93.7 a lalut thei a, tihian opening weekend a a lakluh zawng zawng chu dollar maktaduai 174.2 a ni. He film hi dollar maktaduai 100 vel senga siam a ni.
Sakhaw rinna behchhan, political thriller’Sound of Freedom’ a la kaltluang viau a, dollar maktaduai 20.1 lalut lehin No.3 a la ni, tihian ni 10 chhungin US-ah dollar maktaduai 123.4 a lalut tling ta. He film hi The Passion of the Christ star Jim Caviezel channa niin, a taka thil thleng behchhan a ni a, Department of Homeland Security agent Tim Ballards-a’n naupang ru bo a hralh leh thin te dan hmaa din tir tuma a beih dan vel tarlanna a ni.
Tom Cruise channa ‘Mission: Impossible: Dead Reckoning Part One’-in a weekend vawi hnihnaah dollar maktaduai 19.5 lalut lehin No.1 atangin No.4-ah a tawlh a, tihian ni 10 chhungin US-ah dollar maktaduai 118.8 lalut tawhin, US pawnah dollar maktaduai 252.1 a lalut tawh bawk a, a vaiin dollar maktaduai 370.9 a tling ve tawh bawk.
Box office top 10:
1 Barbie $155,000,000
2 Oppenheimer $80,500,000
3 Sound of Freedom $20,140,647
4 Mission: Impossible Dead Reckoning Part One $19,500,000
5 Indiana Jones and the Dial of Destiny $6,700,000
6 Insidious: The Red Door $6,500,000
7 Elemental $5,800,000
8 Spider-Man: Across the Spider-Verse $2,815,000
9 Transformers: Rise of the Beasts $1,120,000
10 No Hard Feelings $1,075,000
Box office-ah Barbie a No.1
