Box office-ah ‘Black Phone 2’ a No.1
Horror movie ‘Black Phone 2’ chuan tun weekend kalta khan North America-ah cinema hall ticket hralhna atangin dollar maktaduai 26.5 la lutin, Box office No.1 a ni a, he film hian US pawn, ram dang 72 atangin dollar maktaduai 15.5 a la lut bawk a, tihian opening weekend-a a lak luh zawng zawng chu dollar maktaduai 42 a tling. ‘Black Phone 2’ hi dollar maktaduai 30 senga siam a ni.
Black Phone 2-ah hian a film hmasa zawka changtu Ethan Hawke chu serial killer Grabber lemah chang lehin, Mason Thames chu Finn lemah a chang ve leh bawk. He film-ah hian serial killer hian thlan chhung atangin a farnu, Gwen (Madeleine McGraw) chu Finn laka phuba la tura a tih dan vel tarlan a ni.
A film hmasa zawk ‘Black Phone’ chu 2021-a tlangzarh kha niin, opening weekend-a US-ah dollar maktaduai 23.6 a la lut thei a, COVID vanga khawvel a la buai viau lai kha a ni nain, khawvel huapin dollar maktaduai 161 a la lut thei a ni.
Kar kalta box office No.1 ‘Tron: Ares’-in a weekend vawi hnihnaah dollar maktaduai 11.1 la lut lehin No.2 a ni a, tihian kar hnih chhungin US-ah dollar maktaduai 54.6 a la lut tling tawh a, US pawnah maktaduai 49.4 la lut tawh bawkin, a vaiin dollar maktaduai 103 a la lut tling tawh a, he film hi dollar maktaduai 180 vel senga siam a ni.
Aziz Ansari direct, film hlimawm lam ‘Good Fortune’-in opening weekend-ah US-ah dollar 6.2 la lutin, No.3 a ni. He film hi Hollywood star rual Seth Rogen, Ansari, Keke Palmer, Sandra Oh leh Keanu Reeves te channa a ni. A film siam nan hian dollar maktaduai 30 vel an seng a, vantirhkoh pakhin a mi ven thin thlarau chhanhim a tum dan vel tarlanna a ni.
One Battle After Another-in a weekend vawi linaah dollar maktaduai 4 la lut lehin, No.4 a la ni a, he film hian kar li chhungin US-ah dollar maktaduai 61.9 la lut tawhin, US pawna a lak luh nen chuan maktaduai 162.5 a tlin ve ta bawk.
Channing Tatum leh Kristen Dunst te channa, crime comedy movie ‘Roofman’-in a weekend vawi hnihnaah dollar maktaduai 3.7 la lut lehin, top 5 khartuah a tang a, he film hian US-ah dollar maktaduai 15.5 la lut tawhin, US pawna maktaduai 16.4 a lak luh tawh nen a vaiin maktaduai 31.9 a tlin ve ta bawk. He film hi dollar maktaduai 19 senga siam a ni.
Nazi-in Juda an suat lai hun behchhana chan, a taka thil thleng behchhan, ‘Truth & Treason’-in opening weekend-ah dollar maktaduai 2.7 la lutin No.6 a ni.
Psychological thriller ‘After the Hunt’-in dollar maktaduai 1.6 la lutin, No.9 a ni. He film hi a hmain cinema hall paruk-ah chauh tihchhuah a ni a, tun weekend kalta khan cinema hall 1,238-ah tihchhuah a ni ve ta a ni. He film-ah hian Hollywood star lar Julia Roberts, Andrew Garfield leh Ayo Edebiri te an inlan.
Box office top 10:
1 Black Phone 2 $26,500,000
2 Tron: Ares $11,140,000
3 Good Fortune $ 6,200,000
4 One Battle After Another $4,000,000
5 Roofman $3,700,000
6 Truth & Treason $2,721,265
7 Gabby’s Dollhouse: The Movie $1,650,000
8 The Conjuring: Last Rites $1,570,000
9 After the Hunt $1,555,956
10 Demon Slayer -Kimetsu no Yaiba- The Movie: Infinity $1,300,000
Box office-ah ‘Black Phone 2’ a No.1
