Box office-ah ‘Captain America’ a No.1
Marvel Studios-in a changtute mithar vek hmangin Captain America film an siam thar a, a hit nghal khawp mai, ‘Captain America” Brave New World’ hian opening weekend-ah US-ah cinema hall ticket hralhna atangin dollar maktaduai 88.5 la lutin, North American box office No.1 a ni a, US pawnah dollar maktaduai 92.4 a la lut bawk.
Captain America film tharah hian Chris Evans aiah mihang actor Anthony Mackie chu Captain America lemah a chang a, a film siam nan hian dollar maktaduai 180 vel (marketing tel lovin) an seng. He film hi Julius Onah direct niin, Harrison Ford chu US President Thaddeus ‘Thunderbolt’ Ross lemah changin, ani hian Captain America chu official military-ah dinhmun sang a chan tir a. Mahse, Sam Wilson (Captain America) chuan thutlukna a siam fel hmain thil inthup a hai chhuak ta tlat. He film-ah hian Danny Ramirez chu Joaquin Torres/Falcon lemah changin, Liv Tyler, Tim Blake Nelson leh Rosa Salazar te pawh an inlan.
‘Paddington in Peru’-in dollar maktaduai 13 la lutin No.2 a ni a, he film hi Paddington franchise-a a film pathumna a ni. He film hi US-a an tlangzarh hmain international market-ah an lo tichhuak tawh a, dollar maktaduai 115.8 a la lut man tawh nghe nghe a ni. A film siam nan hian dollar maktaduai 90 vel an seng.
Valentine’s Day theme film ‘Heart Eyes’ pawhin a weekend vawi hnihnaah dollar maktaduai 10 la lut lehin No.3 a ni a, kar hnih chhungin US-ah dollar maktaduai 22.6 a la lut tawh. He film hi dollar maktaduai 18 seng a siam a ni.
Animated film ‘Dog Man’-in dollar maktaduai 9.73 la lut lehin No.1 atangin No.4-ah a tawlh a, he film hian kar thum chhungin US-ah dollar maktaduai 69.6 a la lut tawh.
Chinese tawng hmang film ‘Ze Zha 2’ pawh US-ah an tlangzarh ve ta a, opening weekend-ah dollar maktaduai 7.3 la lutin No.5 a ni. He film hian US-a an tlangzarh hmanin khawvel ram dangah dollar tluklehdingawn 1.1 a la lut man tawh.
Box office top 10:
1 Captain America: Brave New World $88,500,000
2 Paddington in Peru $13,000,000
3 Heart Eyes $10,000,000
4 Dog Man $9,730,000
5 Ne Zha 2 $7,300,000
6 Love Hurts $4,370,000
7 Mufasa: The Lion King $4,158,000
8 One of Them Days $2,975,000
9 Companion $1,870,000
10 Flight Risk $1,640,000
Box office-ah ‘Captain America’ a No.1
