Box Office-ah ‘Five Nights at Freddy’s 2’ a No.1
Horror movie ‘Five Nights at Freddy’s 2’ chuan tun weekend kalta khan North America-ah cinema hall ticket hralhna atangin dollar maktaduai 63 la lutin, North American box office No.1 a ni a, he film hian US pawn, ram hrang hrang 76 atangin dollar maktaduai 46.1a la lut thei bawk a, tihian opening weekend-ah a vaiin dollar maktaduai 109 a la lut tling ta a ni. He film siam nan hian (marketing tel loin) dollar maktaduai 36 an seng.
‘Freddy’s 2’ hi chetha viau mah se a film hmasa zawk ‘Five Nights at Freddy’s’ chu opening weekend sum lak luhah chuan a pha ta chuang lo a, a film hmasa zawk hian 2023 khan opening weekend-ah US-ah dollar maktaduai 80 a la lut thei a, dollar maktaduai 300 chuang a la lut tawh bawk. A film pahnihnaah hian Josh Hutcherson bawk a changtupa ni lehin, Emma Tammi chu director a ni leh bawk.
Animated film ‘Zootopia 2’-in a weekend vawi thumnaah US-ah dollar maktaduai 43 a la lut leh theia, box office No.2 a la ni. He film hian US-ah kar thum chhungin dollar maktaduai 220.6 a la lut tling tawh a, US pawnah maktaduai 695.3 la lut tawh bawkin, a vaiin dollar maktaduai 915.9 a la lut tling tawh a, dollar tluklehdingawn a hnaih ta khawp mai.
Zootopia 2 hian China-ah dollar maktaduai 430 a la lut thei a, Hollywood film zinga China-a sum la lut tam ber dawttu niin, Avengers: Endgame chiah a pha lo.
Ariana Grande leh Enrivo te channa ‘Wicked: For Good’-in a weekend vawi thumnaah dollar maktaduai 16.8 la lut lehin No.3 a la nia, he film pawh hian kar thum chhungin US-ah maktaduai 297 la lut tawhin, US pawn, ram 80 atangin dollar maktaduai 143.2 a la lut tawh bawk a, khawvel huapin kar thum chhungin dollar maktaduain 440.1 a la lut tling ta bawk.
Anime film tlangzarh thar ‘Jujutsu Kaisen: Execution’-in dollar maktaduai 10 la lutin, No.4 a ni a, ‘Now You See Me: Now You Don’t’-in dollar maktaduai 3.5 la lut lehin No.4 a ni a, he film pawh hian khawvel huapin dollar maktaduai 210 a la lut tling tawh bawk.
Quentin Tarantino film siam ‘Kill Bill: The Whole Bloody Affair’-in dollar maktaduai 3.25 la lutin, No.5 a ni. e project-ah hian 2003-a Kill Bill: Vol 1 leh 2004-a Kill Bill: Vol 2 te kaihkawp a ni a, a vawi khat nan an la tilan ngai loh anime sequence a tel thar bawk. A film pawh darkar li chuanga sei a ni.
Box office top 10:
1 Five Nights at Freddy’s 2 $63,000,000
2 Zootopia 2 $43,000,000
3 Wicked: For Good $16,750,000
4 Jujutsu Kaisen: Execution $10,155,000
5 Now You See Me: Now You Don’t $3,500,000
6 Kill Bill: The Whole Bloody Affair $3,250,000
7 Eternity $2,726,043
8 Hamnet $2,300,000
9 Predator: Badlands $1,857,000
10 The Running Man $1,115,000
Box Office-ah ‘Five Nights at Freddy’s 2’ a No.1
