‘Kung Fu Panda 4’ leh ‘Dune: Part Two’ te box office-ah an la che ]ha viau a, Jack Black-a’n a aw a thawhna ‘Kung Fu Panda 4’ hian an tlangzarh atanga weekend vawi hnihnaah ‘Dune 2’ chu box office No.1 atangin a nawr tawlh ta a, box office No.1 a ni.
Kung Fu Panda 4 hian tun weekend kalta khan Nort America-ah cinema hall ticket hralhna atangin dollar maktaduai 30 lalut lehin, box office No.2 atangin No.1-ah a invawrh kai a, he animated film hian ni 10 chhungin US-ah cinema hall ticket hralhna atangin dolar maktaduai 107.7 a lalut tling ta a, US pawnah dollar aktaduai 68.6 lalut tawh bawkin, a vaiin dollar maktaduai 176.4 a tlin ta a ni.
Thimothee Chalamet leh Zendaya te channa ‘Dune 2’ pawh ala kaltluang viau a, a weekend vawi thumnaah dollar maktaduai 29.1 lalut lehin No.1 atangin No.2-ah a tawlh ta a, he film hian kar thum chhungin US-ah dollar maktaduai 205.3 a lalut tling ta a, US pawnah dollar maktaduai289.4 lalut tawh bawkin a vaiin dollar maktaduai 494.7 a tlin ta a ni. Dune film hmasa zawk, 2021-a an tlangzarh khan dollar maktaduai 433 a lalut thei a, Dune 2 hian sum lakluh tamah a film hmasa zawk hi a khum der tawh a, dollar maktaduai 600 vel tal chu lalut thei turin an chhut.
Film tlangzarh thar, milar rual channa adventure drama ‘Arthur the King’-in beisei a pha lo a, he film-ah hian Mark Wahlberg Simu Liu, Juliet Rylance, Nathalie Emmanuel, Ali Suliman, Paul Guilfoyle leh real-life adventure racer leh TV host Bear Grylls te an chang a, pro adventure racer pakhat (Wahlberg) an team-in ni 10 chhunga mel 435 a thui an kal hnu a a ui, Arthur nena inzawmna nghet tak an neih dan vel tarlana a ni. He film hian opening weekend-ah dollar maktaduai 7.5 chauh a lalut nain, box office No.3 a ni pha tho e.
Supernatural horror movie ‘Imaginary’-in dollar maktaduai 5.6 lalut lehin No.4 a ni a, he film hian ni 10 chhungin US-ah dollar maktaduai 18.1 a lalut tling ta a, box office No.5 chu sakhaw rinna lam behchhan film ‘Cabrini’ niin, dollar maktaduai 2.8 lalutin No.5 a ni a, he film hian ni 10 chhungin US-ah dollar maktaduai 12 a lalut tling ve ta. He film hi kum zabi 18-na a Catholic missionary thil tawn, a tak taka thil thleng bechhana a chan a ni.
Box office top 10:
1 Kung Fu Panda 4 $3,00,00,000
2 Dune: Part Two $2,91,00,000
3 Arthur the King $75,00,000
4 Imaginary $56,00,000
5 Cabrini $28,14,183
6 Love Lies Bleeding $24,85,650
7 Bob Marley: One Love $23,00,000
8 One Life $17,08,813
9 The American Society of Magical Negroes $12,50,000
10 Ordinary Angels $10,00,000