Box office-ah ‘Melania’ No.3-ah a debut
US President Donald Trump-a nupui, First Lady of the United States of America Melania Trump documentary ‘Melania’ chuan tun weekend kalta khan North America-ah cinema hall ticket hralhna atangin dollar maktaduai 7.16 la lutin, No.3-ah a debut. Hetihrual hian ‘Send Help’-in dollar maktaduai 19.1 la lutin, NO.1-ah a debut a, ‘Iron Lung’-in dollar maktaduai 17.8 la lutin No.2-ah a debut bawk.
‘Melania’ documentary hi Washington D.C.-a an premiere-ah US President Donald Trump pawh a tel a, ani bakah hian US sorkar-a mipawimawh chi hrang hrang an tel bawk. ‘Melania’ hi a chetha thawkhat viau a, documentary-ah chuan tun kum 20 chhunga opening weekend-a US-a sum la lut hnem ber a la ni. Documentary film-a sum la lut hnem ber chu 2004-a tlangzarh ‘Fahrenheit 9/11’ kha niin, opening weekend-ah dollar maktaduai 23.9 a la lut thei a, a sum lak luh zawng zawng chu khawvel huapin dollar maktaduai 222 a tling thei bawk.
‘Melania’ documenatry hi Brett Ratner direct niin, Amazon MGM Studios-in an buaipui a ni a, anni hian licensing rights dollar maktaduai 40 vel zetin an lei niin an report a awm a, hei bakah hian a marketing atan dollar maktaduai 35 vel an seng niin an tarlang bawk. Melania documentary film hi a pasal Trump avangin politics zawng tak pawhin ngaihven a hlawh a, inbeihna chi hrang hrang pawh a tam hle a, sapram media, an tan lam tilang uchuak thei takte chuan he film hi an tlangzarh hma atangin an lo bei lawk tawh a, opening weekend-ah hian dollar maktaduai 5 pawh la lut pha lo turin an tarlang deuh fur a,mahse, maktaduai 7 chuang a la lut ta a ni.
Sam Raimi direct, Rachael McAdams leh Dylan O’Brien channa thriller ‘Send Help’-in opening weekend-ah dollar maktaduai 19.1 la lutin, No.1-a a debut. He film hi thliarkar rauhsan tawh thian dun an tan vel dan tarlan a ni.
YouTube gaming lama hriathlawh Mark Fischbach (aka the Markiplier) film direct hmasak ber ‘Iron Lung’-in US-ah opening weekend-ah dollar maktaduai 17.8 la lutin No.2-ah a debut. He film hi submarine simulation horror game based a ni.
Box offixe top 10:
1 Send Help $19,102,299
2 Iron Lung $17,800,000
3 Melania $7,161,605
4 Zootopia 2 $5,924,315
5 Avatar: Fire and Ash $5,649,878
6 Shelter $5,531,028
7 Mercy $4,562,937
8 The Housemaid $3,454,341
9 Marty Supreme $2,913,763
10 Return to Silent Hill $1,855,032
Box office-ah ‘Melania’ No.3-ah a debut
