Box office-ah ‘Weapons’ a No.1
Horror movie ‘Weapons’ chuan tun weekend kalta khan US-ah cinema hall ticket hralhna atangin dollar maktaduai 42.5 a la lut a, box office No.1 a ni. He film hian US pawna dollar maktaduai 27.5 la lut bawkin, tihian opening weekend-a a lak luh zawng zawng chu dollar maktaduai 70 a tling.
He film hi Zach Cregger-a direct niin, Julia Garner channa a ni a, zirtirtu pakhatin a zirlai 18 zinga 17 te chu zing dar 2:17-ah chiah chiah an khum atanga thoin, an tlan bo diak tih a hrechhuak a. Josh Brolin chu naupang bo zinga pakhat pa lemah a chang ve thung a, ani chuan an zirtirtu chu a naupangte bo danah a ringhlel ve thung. Alden Ehrenreich, Austin Abrams leh Amy Madigan te pawh an inlan.
Film hlimawm lam, Lindsay Lohan leh Jamie Lee Curtis te channa, ‘Freakier Friday’-in dollar maktaduai 29 la lutin No.2 a ni ve thung a, US pawnah dollar maktaduai 15.5 la lut bawkin, tihian opening weekend-ah khawvel huapin dollar maktaduai 44.5 a la lut thei. He film hi dollar maktaduai 45 senga siam a ni. He film hi kum 2003 khan a original an lo tichhuak tawh a, chutah chuan Lohan leh Curtis tho hi an chang. He film hi Nisha Ganatra direct niin, Lohan chu hmeichhe pakhat a nu (Curtis) nena an taksa inthleng lemah a chang a, an taksa inthleng avanga an buai dan vel tarlanna a ni.
Fantastic Four-in dollar maktaduai 4.6 la lut lehin No.3 a la ni a, Bad Guys 2-in dollar maktaduai 3.05 la lut lehin No.4 a ni a. He film hian kar hnih chhungin US-ah dollar maktaduai 43.4 a la lut ta.
Liam Neeson leh Pamela Anderson te channa ‘Naked Gun’ pawh a la chetha viau a, dollar maktaduai 2.56 la lut lehin No.5 a la ni a, he film pawh hian kar hnih chhungin US-ah dollar maktaduai 33 a la lut tling ve ta bawk.
Superman pawh a weekend vawi 5-naah dollar maktaduai 2.3 la lut lehin No.6 a la ni a, US-ah kar nga chhungin dollar maktaduai 331.2 la lut tawhin, US pawna dollar maktaduai 247.6 a lak luh nen chuan dollar maktaduai 578.8 a la lut tling tawh.
Jurassic World Rebirth-in dollar maktaduai 1.35 la lut lehin No.7 a la ni a. He film hian kar ruk chhungin US-ah dollar maktaduai 326.8 leh US pawnah maktaduai 473.2 la lut tawhin, dollar maktaduai 799.9 a la lut tling tawh a, kumina film dollar maktaduai 800 la lut hmasa ber a ni dawn ta a ni.
Brad Pitt channa F1: The Movie-in dollar 8,90,000 la lut lehin No.8 a ni a, he film pawh hian US-ah dollar maktaduai 178.8 la lut tawhin, US pawnah maktaduai 392.1 a la lut tawh bawk.
Box office top 10:
1 Weapons $42,500,000
2 Freakier Friday $29,000,000
3 The Fantastic Four: First… $4,600,000
4 The Bad Guys 2 $3,050,000
5 The Naked Gun $2,560,000
6 Superman $2,300,000
7 Jurassic World Rebirth $1,350,000
8 F1: The Movie $890,000
9 Together $795,000
10 Sketch $757,679
Box office-ah ‘Weapons’ a No.1
