Brazil-a Brics summit-a a tel pahin Modi-a’n ram pali tlawh dawn

Brazil-a Brics summit-a a tel pahin Modi-a’n ram pali tlawh dawn
Prime Minister Narendra Modi-a chu ram panga tlawh turin karleh hian a zin chhuak dawn a, Brazil-ah Brics Summit-ah telin khawvel chhim lam ram pawimawhte nena inkungkaihna tha zawk a awm zel theihna tur kawng a dap dawn.
Nilainia chhuaka chawlhkar khat a zin chhuah turah hian a tih tur langsar ber chu Rio de Janeiro-a Brics Summit-a a tel tur chu a ni a. Hei hi Brics-a tel ramte zinga ram pawimawh pahnih, India leh Brazil inkungkaihna tihngheh lehzualna tur a ni dawn.
Brazil, Russia, India, China, South Africa, Egypt, Ethiopia, Iran, Indonesia leh United Arab Emirates (UAE) telna Brics hian an inkarah eibara thawhhona tha siam bakah tun tum summit-ah hian khawvel hmun hrang hranga indona leh inepna boruak lian tak awm mekte an sawiho dawn a ni.
India hian thla hmasaa Pakistan nena an intihbuai hnuah an thawhpui ramte hnenah hian ramri kâna firfiaka chetna dona kawnga tanrual a tulzia pawh a tlangaupui dawn a ni.
Brics-a president nihna chelh mektu, Brazil hi India-in khawvel chhim lama thawhpui leh thiana siam a tum zinga mi a ni a. Vantlang nunhona, eibar leh khuarel thilte chu summit-a an sawiho tur lian zingah a tel a. An zinga mi, Russia chuan US dollar-a sumdawnna innghat lutuk hrulah a danga sum leh pai inekna tur duan thar a rawt dawn bawk.
India hi tun tum summit-ah hian Chinese President Xi Jinping leh Russian President Vladimir Putin te an tel dawn lo tih sawi awm mah se tel ngei a duh a. The South China Morning Post chuan Nilaini khan Brazilian President Luiz Inácio Lula da Silva-a’n summit zawh hnuah Modi-a hi zanriah kilpui tura a sawm thu leh hei hi Beijing-in an president kal lo tura thutlukna a siamnaah a kaihruaitu ber a ni tih a lo tar lang tawh.
India leh ram dang pangate chuan Modi-a’n a tlawh tur thu an la sawi lo va; mahse, Brazil bakah hian Trinidad & Tobago, Argentina, Ghana leh Namibia a tlawh dawn niin sawi ani.
Heng ram a tlawh turte hi India-in khawvel chhim lam ram pawimawhte nen inkungkaihna nghet zawk a neih theihna tur atana tih a ni a. Eibar leh sumdawnna thilah Argentina nena inpawhna neih that leh zual duhna a awm bawk a, leilung hausakna thil vang tak leisak theihna tura remchanga hman tum a ni tih Modi-a zin tur hriate chuan an sawi.
Modi-a’n ram pali a tlawh turte hi ram venhimna, firfiaka chetna dohona tur, infrastructure, pharmaceutical, ei leh in, energy, digitalisation leh khawvel puma sorkar kaihhnawih thil ngialnghet neih theihna tur a sawipui hlawm dawn niin a hriate chuan an sawi.
Ghana leh Namibia a tlawh tur hi Africa lam India-in a hawina tihthar lehna tur a ni a, a tum ber chu hmasawnna kawng leh sumdawnnaa thawhhona siam a ni a. Hei hi China-in he khawmualpuia hnuhma thar a neih mek zel do letna tur kawng dapna a ni bawk.