Brazil chhim lamah ruahsur nasa lutuk avangin tuilian leh leimin nasa tak thlengin mi 55 chuangin nunna an chan phah tawh tiin tualchhung thuneitute chuan an sawi a.
Rio Grande do Sul ah ringawt pawh mi 74 chu an chin hriat lohin an awm mek tiin official te chuan an sawi bawk.
Kar kalta Inrinni atanga ruahsur nasa intan niin mi 25,000 chuang te chu chenna in leh lo chhuahsan lo thei lova siamin an awm tawh a.
Mi maktaduai chanve vel te chuan power leh tuithianghlim in tur an tlachham mek bawk a, ruahsur lah chuan zual lam a la pan zel dawn nia sawi lawk a ni bawk.
Rio Grande do Sul’s civil defence chuan tuilian kaihhnawiha nunna chan chu 55 an nih tihchiana nih thu sawiin a dang pasarih te chu tuilian kaihhnawih a ni em tih an chhui chian mek thu a sawi.
Extreme weather hi temperature sang lutuk, humidity sang bawk si leh thli na bawk si te inchhawkkhawmin a thlen niin thil thleng khat tak a ni a.
State a khawpui 497 aia tam te chu thlipui hian a tibuai vek a, hmun tam takah kawngpui leh lei te tihchiatin a awm bawk.
Ruahsur nasa chuan leimin nasa taka siamin Bento Concalves khawpui bul lawka hydroelectric dam chu tichimin mi 30-in nunna an chan phah bawk a.
Tui chim chin sang zual zel avangin a bul hnaia dam dang pawh chim hlauhawmin a awm mek tiin thuneitute chuan an sawi bawk.
Regional capital Porto Alegre a Guaibi river chuan a kuang luang liamin kawthlerah tui a luang nasa a chenna in tam tak a chim bawk a. Porto Alegre international airport chu kharin a awm nghal bawk.
Meteorologists te chuan ruahsur chuan zual lam a la pan dawn an ti a. Nikum khan Rio grande do Sul a cyclone tleh vangin mi 30 chaungin nunna an lo chan tawh bawk.
Brazil National Institute of Meteorology te chuan ruahsur nasa zual leh sur zing lutuk chu climate phenomenen EL Nino vang tiin an sawi.
Brazil-ah ruahsur nasa kaihhnawih vangin mi 55 thi
