Brazil in Scotland an sawp

World Cup 2026 khelh mekah Nilaini zing lam khan Group C a mite an inching fel ta a, 3-0 a Scotland sawptu Brazil chu Group champion an ni. Pahnihna ni chunga Morocco an tlang laiin pathumna Scotland dinhmun a derthawng viau thung.
Harhtharna chang Brazil
Football ram ropui, World Cup a champion ngun ber Brazil hian hun eng emaw chen atang khan an ropuina an hloh a, World Cup-ah an champion thei tawh lo. World Cup 2026 ah ngei pawh beisei phak lo takin bul an tan a, Morocco lakah tlawm pumpelh tho mah se an game in beisei a phak lo viau a, sawiselna an hlawh nasa hle. Bul tan chhe viau mah se an fixture a fuh a, Haiti lakah insiamthatna hun an nei. 3-0 a Haiti an hneh hnuin Scotland chu 3-0 bawkin an sawp zui leh a, harhtharna changin group champion an ni ta hial.
Brazil head coach Carlo Ancelotti chuan Haiti laka a squad ngai a hmang deuh vek a, hliam vanga inlan thei lo Raphinha aiah AFC Bournemouth winger Rayan a luhtir a, Rayan lo chu Haiti laka player ngaite an ni. Inkhel pawimawh leh ngaihven hlawh takah Brazil in bul an tan tha a, goal an thun thuai. Inkhel tan atanga minute sarihna lekah Scotland player pawimawh Scot Mctominay tihsual vangin Vinicius Junior chuan hmahruaina goal a thun nghal.
Hma takah goal an thun vangin Brazil an phur a, inrintawkna sang zawk nen Scotland lakah an inlan zui theih phah. World Cup-ah a vawi khat nana kockout round luh ngei tuma tan khawh Scotland in goal thun tum viau mah se an hlawhtling thei lo. Inkhel hmuhnawm takah goal lut a awm belh theih loh reng hnuin Brazil an che fuh hmasa leh a, goal an thun belh. Rayan siamsak atangin goal hmahruai thuntu Vinicius Junior chuan an goal hnihna a thun a, 2-0 a hmahruai chungin chawlhlawk an hmang.
Brazil tan Vinicius Junior a chetha chhunzawm zel a, World Cup 2026-ah vawi thum khel tawhin goal 4 a thun tling tawh a, goal thun tam zual zingah a tel mek. Vini chetha leh Ancelotti-a’n Igor thiago aia a thlan tak Matheus Cunha an chetha dun a, goal an thun zawnin Brazil team a tiphur hle a, champion seiseina sang zawk nen hma lam an pan.
Chawlhlawk hnu lamah inkhel a hmuhnawm chhunzawm a, Scotland in an si phurh sut tumin tan an khawh nasa hle. Goal thun tum viau mah se Brazil team inrem fuh tak an paltlang thei lova, goal an thun thei lo. Scotland in goal an thun theih loh reng laiin Brazil tan Matheus Cunha chuan minute 60-naah an goal thumna a thun a, an chakna a nem nghet. Cunha goal thun hnuin goal dang a luh belh thei tawh lova, 3-0 ngawta hnehna changin Brazil in point thum hlu tak an hmu.
Scotland an hmachhawn tum hian player ropui, football ngainatute hmuh chak Neymar chuan khelmual a lut ta nge nge a, minute 76-naah Cunha a thlak. Neymar hian goal thun lo mah se ball thiam bik a nihna lantirin a che vel a hmuhnawm leh viau a. Inkhel thei tura a dam ta hian Brazil team leh amah tantute a tiphur hle. Player ropui, World Cup dang hmachhawn zui tawh lo tura ngaih zinga mi Neymar a inlan hian World Cup 2026 kalh a tihkim zual belha ngaih a ni.
Scotland lakah an chak vangin Brazil hian khelh thum atanga point 7 hmuin Last 32 an lut a, Group champion ni chungin an tlang. Last 32-ah Group F-a pahnihna an hmachhawn zui leh dawn a, an hmachhawn theih turte hi Netherlands/Japan/Sweden te an ni a. tu emaw ber hi hmachhawn pawh ni se inkhel awlai tak a ni dawn lova, inkhel hautak zawk an hmachhawn ngei tura ngaih a ni.
Brazil in last 32 an luh laiin Scotland dinhmun erawh a chhe viau thung. He thu buatsaih lai thleng hian pathumna ni chunga titha zual pariat zingah palina an ni phak a, point 3 hmuin goal diference-ah -3 a ni bawk. tla hlawm tawp la ni em bik lo mah se Last 32 lut thei turin an dinhmun a chhe viau thung a. thaw dep dep chungin team dang khel an ngaihven reng a ngai dawn.
Saibari a kal zel
Group C a inkhel dangah point li hmu tawh Morocco in tla chiang tawh Haiti an hmachhawn a, 4-2 a hnehna changin last 32 an inhlangkai. Morocco tan Ismaila Saibari a khel tha chhunzawm zel a, Haiti lakah goal khat thun lehin World Cup 2026-ah goal a la thun vek. tla chiang tawh Haiti hian team lian Morocco lakah bul an tan tha viau a, goal an thun hamasa. Inkhel tan atanga minute 10-na lekah Morocco player Yassine Bounou chuan an lamah ti-goal in Haiti hmahruaina goal a thunsak. Si an phurh reng hnuin Achraf Hakimi chuan minute 39-naah goal thunin an si phurh a sut. 1-1 a nih hnuin Haiti an che fuh hmasa leh a, Wilson Isidor chuan minute 43-naah hma an hruai nawn lehna goal a thun. Hnufual nawn leh mah se Morocco tan Ismael Saibari chuan minute 45’+1-ah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau naa Morocco lam chan a ni deuh chawt tawh thung. Soufiane Rahimi chuan minute 78-naah hma an hruai letena goal a thun a. Hun tawp dawn hnaih minute 89-naah Gessime Yassine chuan an goal lina a thun belh zui leh a, an chakna a nem nghet. Beisei aia inkhel hmuhnawmah Morocco in Haiti chu 4-2 in an hneh a, Group C-ah pahnihna ni chungin last 32 an lut.
An that rual lai hun tawng mek Morocco hian last 32 ah inkhel hautak an hmachhawn zui a ngai dawn a, Netherlands nen intum theihna hun tha tak an nei. Morocco hian Group F-a champion an tum dawn a, champion ni turin Netherlands dinhmun a tha hle.